Stórsigur Englands í skugga kynþáttaníðs

Ástrós Ýr Eggertsdóttir skrifar
Raheem Sterling og Harry Kane létu hegðun stuðningsmannanna í stúkunni ekki á sig fá
Raheem Sterling og Harry Kane létu hegðun stuðningsmannanna í stúkunni ekki á sig fá Vísir/Getty

Enska landsliðið vann stórsigur á Búlgaríu í undankeppni EM 2020 í leik þar sem úrslitin falla í skugga óeirða stuðningsmanna sem beittu leikmenn Englands kynþáttaníði.

England vann leikinn 6-0 og eru komnir ansi nálægt því að tryggja farseðil sinn á lokakeppni EM 2020. Marcus Rashford, Ross Barkley, Raheem Sterling og Harry Kane sáu um markaskorun Englands.

Leikurinn er hins vegar ekki aðal umræðuefnið eftir kvöldið þar sem dómarinn þurfti tvisvar sinnum að stöðva leikinn vegna kynþáttaníðs frá stuðningsmönnum Búlgaríu.

Hópur öfgastuðningsmanna yfirgaf völlinn rétt fyrir hálfleik, þegar dómarinn þurfti að stöðva leikinn í annað skipti.

Í seinni hálfleik gat leikurinn farið fram án stopps, en upplifun allra sem voru á vellinum í Búlgaríu af þessu kvöldi verður lituð af atburðunum í stúkunni frekar en frábærri frammistöðu enska liðsins.

Englendingar áttu 13 skot á markið á móti tveimur frá heimamönnum og voru þeir 72 prósent með boltann og stjórnuðu leiknum frá A til Ö.

England er með 15 stig á toppi A riðils eftir sex leiki.
 

Bein lýsing

Leikirnir




    Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
    Velkomin á Vísi. Þessi vefur notar vafrakökur. Sjá nánar.