Innlent

Algjörar „fríkaðstæður“ í hættulegri Laxá í Kjós

Kolbeinn Tumi Daðason skrifar
Svavar sýpur á kaffi við borð sem vanalega er á þurru landi. Ekki þessa dagana.
Svavar sýpur á kaffi við borð sem vanalega er á þurru landi. Ekki þessa dagana.

„Við erum í algjörum fríkaðstæðum hérna,“ segir Svavar Hávarðsson veiðimaður um stöðu mála við Meðalfellsvatn í Kjós. Þar er bókstaflega allt á floti. Eitthvað sem veiðimenn á Íslandi hafa ekki átt að venjast í þurrkatíð í sumar. Nú er vandamálið þveröfugt.

„Þetta fer úr því að vera náttúruhamfarir vegna vatnsskorts yfir í að vera flóð,“ segir Svavar.

Svavar er við veiðar með bróður sínum Björgólfi og fleiri vinum sem sækja Laxá í Kjós heim árlega. Nú er áin, sem hefur gefið mörgum veiðimanninum góðan lax, hins vegar ekki falleg laxá heldur kolsvört af mold.

Bræðurnir Björgólfur og Svavar brugðu á leik í morgun.

Svavar telur líklegt að einhvers staðar hafi fallið skriða og nú sé áin eins og kakó. Algjörlega óveiðandi.

„Hún er hreinlega hættuleg eins og hún er núna.“

Þó er ekki um algjöra fýluferð að ræða hjá þeim félögum. Hollið sem þeir eru í hefur veitt samanlegt átta laxa í Bugðu, í gærkvöldi og morgun, en Bugða rennur í Laxá í Kjós.

Um er að ræða vinahóp sem hefur komið í veiðihúsið undanfarin sex til sjö ár.

„Við höfum séð hana í flóði og alls konar. Þetta er algjörlega fordæmalaust.“


Klippa: Allt á floti í Laxá í Kjós

Fólk innlyksa í Langavatnsdal

Björgunarsveitir hafa verið kallaðar út og þyrla Landhelgisgæslunnar sömuleiðis send vegna fólks sem varð innlyksa í Langavatnsdal. Vegurinn er í sundur nánast alls staðar þar sem hann liggur yfir ræsi.

Björgunarsveitarfólk var ræst út um eittleytið en á þriðja tímanum var óskað eftir aðstoð þyrlu Landhelgisgæslunnar. Aðstæður eru þó svo erfiðar á vettvangi að ekki er ljóst hvort hægt sé að lenda þyrlunni.

Reikna má með úrhellisrigningu á Vestfjörðum, Breiðafirði og Faxaflóka næstu daga.

Uppfært klukkan 16:15
Ferðamennirnir eru komnir til byggða.

Vatnavextir eru gífurlegir í ánni. Björgólfur Hávarðsson
Laxá í Kjós er mikil veiðiá, en ekki í dag. Björgólfur Hávarðsson
Haraldur Eiríksson sem hefur selt veiðileyfi í ána í á þriðja áratug segist ekki muna eftir öðru eins vatnsmagi í ánni á veiðitíma. Björgólfur Hávarðsson


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.