Íslensku stelpurnar skoruðu tíu fyrstu mörkin og rúlluðu upp Bretunum

Íslenska nítján ára landslið kvenna í handbolta spilar um fimmta til áttunda sæti í B-deild Evrópukeppninnar eftir 27 marka sigur á Bretum í dag, 39-12, í lokaleik sínum í riðlakeppninni.

HK-ingurinn Tinna Sól Björgvinsdóttir var markahæst í íslenska liðinu með átta mörk en hún skoraði öll mörkin sín í fyrri hálfleiknum. Tinna Sól var valinn besti leikmaður vallarins.

Sigurinn tryggði stelpunum þriðja sætið í riðlinum á eftir Serbíu og heimastúlkum í Búlgaríu. Ísland mætir Finnlandi í næsta leik og spilar um fimmta sætið í mótinu vinni liðið hann.

Alls skoruðu sex leikmenn íslenska liðsins fjögur mörk eða meira í leiknum en Lena Margrét Valdimarsdóttir var næstmarkahæst með sex mörk og Þóra María Sigurjónsdóttir skoraði fimm mörk.

Íslensku stelpurnar höfðu tapað tveimur leikjum í röð en mættu grimmar til leiks í dag og þær bresku áttu aldrei möguleika.

Íslenska liðið skoraði tíu fyrstu mörk leiksins og hélt hreinu fyrstu fjórtán mínútum leiksins. Ísland var 18-6 yfir í hálfleik og var 30-9 yfir þegar fimmtán mínútur voru eftir.

Lena Margrét Valdimarsdóttir skoraði fyrsta mark leiksins eftir nokkrar sekúndur og gaf síðan fimm stoðsendingar á félaga sína á meðan íslenska liðið komst í 10-0. Tinna Sól Björgvinsdóttir var komin með fimm mörk eftir aðeins átta mínútna leik.

Það var strax ljós í hvað stefndi og íslensku stelpurnar bætti við forystuna allan leikinn. Á endanum munaði 27 mörk á liðunum tveimur.

Mörk íslenska liðsins í leiknum:

Tinna Sól Björgvinsdóttir 8

Lena Margrét Valdimarsdóttir 6

Þóra María Sigurjónsdóttir 5

Katla María Magnúsdóttir 4

Auður Ester Gestsdóttir 4

Berta Rut Harðardóttir 4

Anna Karen Hansdóttir 3

Birta Rún Grétarsdóttir 2

Harpa María Friðgeirsdóttir 2

Alexandra Líf Arnarsdóttir 1