Varamaðurinn tryggði Evrópumeisturunum þriðja sigurinn í jafn mörgum leikjum

Ingvi Þór Sæmundsson skrifar
Lineth Beerensteyn skorar sigurmark Hollands.
Lineth Beerensteyn skorar sigurmark Hollands. vísir/getty

Evrópumeistarar Hollands unnu Kanada, 2-1, í lokaleik sínum í E-riðli heimsmeistaramóts kvenna í dag.

Hollendingar unnu alla þrjá leikina sína í riðlinum. Kanadíska liðið vann tvo leiki og lenti í 2. sæti riðilsins.

Strax á upphafsmínútu leiksins fékk Kanada vítaspyrnu. Svo héldu leikmenn liðsins allavega en eftir að hafa skoðað atvikið á myndbandi sá Stéphanie Frappart, dómari leiksins, að brotið var fyrir utan teig. Um miðjan fyrri hálfleik var mark svo dæmt af Kanada vegna rangstöðu.

Holland jók pressuna eftir því sem leið á fyrri hálfleikinn og Vivianne Miedema átti skot í stöng. Staðan var hins vegar markalaus í hálfleik.

Á 54. mínútu náðu Hollendingar forystunni þegar varnarmaðurinn Anouk Dekker skoraði með skalla eftir aukaspyrnu Sherida Spitse.

Sex mínútum síðar jafnaði Christine Sinclair metin með föstu skoti af fjærstönginni eftir fyrirgjöf Jordyn Huitema. Þetta var 182. landsliðsmark Sinclair sem skoraði þarna á sínu fimmta heimsmeistaramóti. Sinclair og hin brasilíska Marta eru þær einu sem hafa afrekað það.


Þegar stundarfjórðungur var til leiksloka tryggði varamaðurinn Lineth Beerensteyn Hollandi sigurinn þegar hún ýtti boltanum yfir línuna eftir góða hollenska sókn og fyrirgjöf Desiree van Luntern frá hægri.

Fleiri urðu mörkin ekki og Holland fagnaði sínum þriðja sigri í jafn mörgum leikjum á HM.

Bein lýsing

Leikirnir




    Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
    Velkomin á Vísi. Þessi vefur notar vafrakökur. Sjá nánar.