„Allt eða ekkert“ hjá Leo Messi í kvöld og það á besta tíma

Lionel Messi er enn að elta titil með argentínska landsliðinu og í kvöld spilar liðið við Venesúela í átta liða úrslitum Suðurameríkukeppninnar. Messi er orðinn 32 ára gamall og er fær ekki mörg tækifæri til að vinna titil með Argentínu.

Tveir leikir fara fram í Copa America 2019 í kvöld og verða þeir báðir í beinni á Stöð 2 Sport. Fyrst er leikur Venesúela og Argentínu klukkan 19.00 og svo er leikur Kólumbíu og Síle klukkan 23.00.

Það eru margir spenntir fyrir fyrri leiknum sem fer fram á besta tíma í kvöld. Lionel Messi hefur unnið 34 titla með Barcelona á ferlinum en hann á enn eftir að vinna stóran titil með argentínska landsliðinu.

Messi er án nokkurs vafa í hópi allra bestu knattspyrnumanna sögunnar en vantar tilfinnanlega stóra titla með argentínska landsliðinu í baráttunni fyrir að vera sá besti.

Messi vann reyndar heimsmeistarakeppni 20 ára landsliða árið 2005 og síðan Ólympíugull árið 2008. Messi var 21 árs á leikunum í Peking en hefur síðan lifað sín bestu ár sem knattspyrnumaður án þess að vinna titil með argentínska landsliðinu.

Messi og félagar í argentínska landsliðinu rétt skriðu inn í átta liða úrslitin með sigri á Katar í lokaleik riðlakeppninnar. Þeir fengu aðeins eitt stig út úr tveimur fyrstu leikjum sínum í keppninni.

„Nú byrjar ný Copa fyrir okkur og nú er bara allt eða ekkert,“ sagði Lionel Messi á blaðamannafundi fyrir leikinn í kvöld.

„Við þurftum á leiknum á móti Katar að halda til að öðlast sjálfstraust og meiri ró. Liðið er að vaxa í hverjum leik,“ sagði Messi.

Argentína hefur unnið Copa America fjórtán sinnum en það eru 26 ár síðan að argentínska landsliðið vann hana síðast. Liðið hefur komist í fjóra af síðustu fimm úrslitaleikjum keppninnar en tapað í öll skiptin.

Í síðustu tveimur úrslitaleikjum Suðurameríkukeppninnar hafa Argentínumenn tapað í vítakeppni á móti Síle. Messi hætti í landsliðinu eftir seinni leikinn en tók síðan landsliðsskóna aftur ofan af hillunni.