Innlent

Játaði að hafa ætlað að smygla tólf kílóum af hassi til Færeyja

Sunna Kristín Hilmarsdóttir skrifar
Fíkniefnunum átti að smygla úr landi með ferjunni Norrænu.
Fíkniefnunum átti að smygla úr landi með ferjunni Norrænu. vísir/jói k.

27 ára gamall danskur ríkisborgari hefur játað að hafa í janúar síðastliðnum ætlað að smygla tólf kílóum af hassi til Færeyja með Norrænu.

Þá hefur 26 ára gamall íslenskur karlmaður játað að hafa haft umrædd fíkniefni í vörslu sinni í sölu- og dreifingarskyni um ótilgreindan tíma þar til smygla átti þeim úr landi.

Ákæra á hendur mönnunum var gefin út í maí síðastliðnum en auk þeirra er þriðji maðurinn ákærður í málinu. Ákæra hefur hins vegar ekki verið birt honum og hefur Vísir því ekki upplýsingar um sakargiftir á hendur honum.

Í ákæru kemur fram að þriðjudaginn 8. janúar á þessu ári hafi lögreglan fundið 12,7 kíló af hassi í farangri danska mannsins þar sem hann var á leið um borð í Norrænu til Færeyja.

Íslendingurinn er einnig ákærður vegna þessara efna en að auki fundust tæp 900 grömm af hassi við leit á heimili hans.

Götuvirði tólf kílóa af hassi hér á landi eru rúmlega 29 milljónir króna þar sem grammið kostar um 2300 krónur samkvæmt verðkönnun SÁÁ. Þá er almennt miðað við það að smygl á einu kílói af hassi jafngildi einum mánuði í fangelsi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.