Segir Barnaverndarnefnd Seltjarnarness hafa brugðist barni sem bjó við ofbeldi

Sextán ára stúlka og faðir hennar hafa kvartað til Barnaverndarstofu vegna starfa Barnaverndarnefndar Seltjarnarnesbæjar. Stúlkan er sögð hafa búið við verulega vanrækslu af hálfu móður alla ævi og að sögn lögmanns feðginanna sýna gögn málsins að nefndin hafi verið meðvituð um vandann árum saman án þess að gera viðeigandi ráðstafanir.

Stúlkan hefur búið hjá móður sinni alla tíð sem er með geðhvarfasýki og glímir við áfengisvanda. Í gögnum málsins segir að móðirin hafi haft miklar ranghugmyndir um föður stúlkunnar og umgengni við barnið því ætíð verið slitrótt. Það var ekki fyrr en móðirin var vistuð á geðdeild síðasta haust að faðirinn fékk tímabundið forræði.

Þá opnaði stúlkan sig um aðstæður sínar og ákváðu feðginin að leita til lögmanns. Þá kom í ljós að barnaverndarnefnd Seltjarnarness hafi ítrekað borist ábendingar um aðstæður barnsins án þess að bregðast við með fullnægjandi hætti.

Fréttastofa hefur gögn nefndarinnar undir höndum.

Þau sýna að þegar stúlkan var fimm ára hafi móðirin lokað sig af í nokkrar vikur og ekki látið dóttur sína á leikskólann. Nefndin hafi verið kölluð til eftir að móðirin var svipt sjálfræði og lögð inn á geðdeild. Stúlkan var vistuð tímabundið hjá móðurforeldrum og ekki var talin þörf á frekari eftirliti. Faðirinn var ekki látinn vita.

Þegar stúlkan var tíu ára hafði lögregla samband við Barnaverndarstofu vegna heimilisofbeldis. Í skýrslu segir að móðirin hafi verið búin að loka sig inni í nokkra daga með stúlkunni. Stúlkan sagði í viðtali að mamma hennar hafi hvorki eldað né borðað, bara reykt.  Sjálf hafi hún borðað snakk þegar maturinn kláraðist. Mamma hennar hafi talað skringilega og sagt að það væri fólk að koma út úr málverkunum. 

Aftur var faðirinn ekki látinn vita og í gögnum segir að það hafi verið vegna þess að barnið segðist ekki tala við hann lengur. Ekki hafi unnist tími til að kanna það frekar og stúlkan var vistuð hjá móðurforeldrum. Nefndin fékk þau tilmæli að tryggja áfram öryggi barnsins.

„Á þessum tímapunkti hefði verið tími til að grípa inn í af hálfu barnaverndaryfirvalda og þá vista barnið við viðunandi aðstæður en barnaverndarnefnd að hafðist ekkert og lokaði málinu,“ segir Sævar Þór Jónsson, lögmaður.

Vísbendingar um að brotið hafi verið á stúlkunni kynferðislega

Nefndinni hafi áfram borist ábendingar um slæmar aðstæður barnsins, bæði frá lögreglu og föður. Það var þó ekki fyrr en síðasta haust sem barnaverndarnefnd þótti nauðsynlegt að vista stúlkuna hjá föður sínum, en þá var tekinn til starfa nýr starfsmaður hjá nefndinni.

„Í kjölfarið af því að þetta mál er tekið upp aftur og það er farið að fara í gegn um gögn málsins kemur í ljós að líkamlegt og kynferðislegt ofbeldi hafi átt sér stað og barnaverndarnefnd grípur þá loksins inn í með þeim hætti að kæra málið til lögreglu,“ segir Sævar Þór.

Í beiðni Seltjarnarnesbæjar um lögreglurannsókn segir að fram séu komnar vísbendingar um að stúlkan hafi orðið fyrir kynferðisbrotum frá átta ára aldri af hálfu móður sinnar og sambýlismanna

„Það má segja að vanrækslan hafi verið viðloðandi í fimmtán ár.“  

Í beiðni til lögreglu segir einnig að stúlkan hafi búið við mikla vanrækslu af hálfu móður alla ævi. 

„Bæði samskipti mín við starfsmann nefndarinnar og af gögnum málsins má segja að nefndin sé búin að viðurkenna mistök í þessu máli,“ segir Sævar Þór.

Í skriflegu svari til fréttastofu segir félagsmálastjóri Seltjarnarnesbæjar að starfsmenn nefndarinnar geti ekki rætt barnaverndarmál opinberlega. Feðginin hafa farið fram á að bærinn viðurkenni bótaábyrgð enda hafi nefndin átt að vera meðvituð um vanræksluna.

„Við höfum líka sent beiðni til barnaverndarstofu þar sem við óskum eftir því að það verði gerð úttekt á barnaverndarnefnd Seltjarnarnesbæjar og störfum þeirra.“