Lokahringurinn sá besti hjá Valdísi Þóru

Valdís Þóra Jónsdóttir endaði í 24.-29. sæti á Jabra Ladies Open-mótinu í golfi sem er hluti af Evrópumótaröðinni.

Valdís Þóra lék lokahringinn í dag á einu höggi yfir pari.

Þetta var hennar besti hringur á mótinu en hún lék fyrstu tvo hringina á þremur höggum yfir pari. Skagakonan lauk leik á samtals sjö höggum yfir pari.

Valdís Þóra fékk þrjá fugla, tvo skolla og einn skramba á hringnum í dag.

Enski kylfingurinn Annabel Dimmock hrósaði sigri á mótinu. Hún lék samtals á sjö höggum undir pari og var einu höggi á undan hinni frönsku Pauline Bouchard.