Þrír frá City tilnefndir

Þrír leikmenn Englandsmeistara Manchester City koma til greina sem besti leikmaður tímabilsins í ensku úrvalsdeildinni. Þetta eru þeir Sergio Agüero, Raheem Sterling og Bernardo Silva.

Leikmaður frá City hefur aldrei fengið þessa viðurkenningu frá því byrjað var að veita hana tímabilið 1973-74.

Tveir leikmenn Liverpool eru tilnefndir í ár; Virgil van Dijk og Sadio Mané.

Þá er Chelsea-maðurinn Eden Hazard tilnefndur. Hann fékk þessa viðurkenningu tímabilið 2014-15.

Mohamed Salah, leikmaður Liverpool, fékk þessi verðlaun í fyrra. Hann er ekki tilnefndur að þessu sinni.

Sterling og Silva eru einnig tilnefndir sem besti ungi leikmaðurinn. Auk þeirra eru Marcus Rashford (Manchester United), Trent Alexander-Arnold (Liverpool), Declan Rice (West Ham) og David Brooks (Bournemouth) tilnefndir.