Aprílspá Siggu Kling – Fiskarnir: Hefur svo mikla daðurhæfileika

Elsku Fiskurinn minn, það eru svo margir að fylgjast með þér því þú ert eins og nafli alheimsins, gætir sett heimsmet í hverju sem er. Taktu þér samt tíma til að anda, því súrefni er það mikilvægasta sem þú átt.

Þú hefur svo mikla daðurhæfileika þótt þú gerir þér ekki alltaf grein fyrir því, við konur og karla, börn og gamalmenni, meðvitað og ómeðvitað. Settu þér bara skýr markmið, skrifaðu þau niður því þú ert hefur svo miklar tilfinningar að þær geta hlaupið með þig í gönur og látið þig hverfa frá þínum markmiðum.

Það er svo magnað hvað þú verður á réttum stað á réttum tíma og nærð svo góðu tengslaneti við þá sem eru áhrifavaldar og geta kippt því í liðinn sem þig vantar og þegar þig vantar.  Músík og list allskonar þarf að fléttast inn í lífsveginn þinn, því annars fölnaru, svo dansaðu og vertu skapandi – það er þitt rétta eðli.

Ef þig vantar eitthvað þá þarftu bara að spyrja, standa upp og ná í það því þú ert búinn að vera á aflmiklu tímabili síðustu mánuði sem hefur snúið þér og þínum tilfinningum allan hringinn, en núna áttarðu þig á því hvað þú þarft að gera og segja til þess að fá það sem þú þarfnast. Notaðu svo bara óspart þessa óviðjafnanlegu töfra þína til að gera lífið betra og betra.

Í ástinni þarftu að hafa öryggi og heiðarleika, þú ert dásamlegur maki og vinur, skemmtilega stjórnsamur en tryggur. Þú hefur svo mikla alheimsást og um leið og þú blandar kærleikanum við þá ást ertu fullkominn. Þú þarft ekki að hugsa of mikið um hvort allt verði í lagi í sumar, næsta haust eða eftir tíu ár eða eitthvað því þá missirðu tilfinninguna á því sem er hér og nú, notaðu hjartagæsku þína sem þú svo sannarlega hefur nóg af og Gríptu Daginn – „Carpe Diem“.

Knús og kossar, þín Sigga Kling

Frægir Fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign og Baby Kling, Lína Rut listaperla, Nanna Lovísa dýranuddari, Höskuldur Kári Schram fréttamaður.