Fótbolti

Donnarumma færði Sampdoria sigurinn á silfurfati

Ingvi Þór Sæmundsson skrifar
Donnarumma gerði sig sekan um slæm mistök gegn Sampdoria.
Donnarumma gerði sig sekan um slæm mistök gegn Sampdoria. vísir/getty
Aðeins eitt mark var skorað í leik Sampdoria og AC Milan í ítölsku úrvalsdeildinni í kvöld.

Það kom strax á upphafsmínútu leiksins. Gianluigi Donnarumma, markvörður Milan, sendi boltann þá beint á Gregoire Defrel sem þakkaði pent fyrir sig og skoraði eina mark leiksins. Lokatölur 1-0, Sampdoria í vil.

Þetta var annað tap Milan í röð en það er í fyrsta sinn í vetur sem það gerist. Liðið er í 4. sæti deildarinnar. Sampdoria er í 8. sætinu.

Juventus jók forskot sitt á toppi deildarinnar í 18 stig með 1-0 sigri á Empoli á heimavelli.

Ungstirnið Moise Kean kom meisturunum til bjargar en hann skoraði eina mark leiksins á 72. mínútu, aðeins þremur mínútum eftir að hann kom inn á sem varamaður.




Fleiri fréttir

Sjá meira


×