Innlent

IWF segir frumvarp sjávarútvegsráðherra stríðsyfirlýsingu

Andri Eysteinsson skrifar
Kristján Þór Júlíusson er harðlega gagnrýndur vegna draga hans að frumvarpi um breytingu laga sem snýr að fiskeldi, líkt og þessu í Patreksfirði.
Kristján Þór Júlíusson er harðlega gagnrýndur vegna draga hans að frumvarpi um breytingu laga sem snýr að fiskeldi, líkt og þessu í Patreksfirði. Vísir/Einar/Vilhelm
Drög sjávarútvegs- og landbúnaðarráðherra, Kristjáns Þórs Júlíussonar, að frumvarpi til laga um breytingu á ýmsum lagaákvæðum sem tengjast fiskeldi er stríðsyfirlýsing á hendur þeim sem vernda vilja lífríkið og starfa á vísindalegum grundvelli. Þetta segir í yfirlýsingu frá Icelandic Wildlife Fund, IWF.

Frumvarpið sem um ræðir snýr að breytingum á lögum um fiskeldi, nr. 71/2008. Samráð stendur nú yfir vegna frumvarpsins og má senda inn umsagnir til ráðuneytisins á vef samráðsgáttarinnar til 13. þessa mánaðar.

Skiltið hékk í innritunarsal Leifsstöðvar í tíu daga en var þá tekið niður að ákvörðun Isavia. Ákvörðun sem kom Icelandic Wildlife Fund mjög á óvart.IWF

Ráðherra hafi tekið sér stöðu gegn náttúruverndarsamtökum

Samtökin IWF vöktu athygli á haustmánuðum til að mynda vegna auglýsingar samtakanna sem ekki fékk að standa í Leifsstöð.

Umrædd auglýsing byggði að sögn Jóns Kaldal, talsmanns Icelandic Wildlife Fund, á óumdeildum vísindalegum staðreyndum um neikvæð áhrif stórfellds laxeldis í opnum sjókvíum á umhverfið og lífríkið og að auglýsingin hafi hvorki beinst að nafngreindum fyrirtækjum né hafi fólk verið hvatt til að sniðganga tilteknar vörur. Jón sagði samtökin einnig hissa á því að Isavia hafi tekið auglýsinguna niður.

Svör Isavia voru á þá leið að höfuðáhersla væri lögð á að auglýsa vörur og þjónustu en ekki auglýsingar um álitamál þar sem tveir hópar takast á við umdeild málefni.

Í yfirlýsingu IWF, sem birtist á Facebook síðu samtakanna, segir að ráðherra hafi með því að leggja fram drögin að frumvarpinu, tekið sér stöðu með sjókvíaeldisfyrirtækjanna gegn vísindamönnum Hafrannsóknarstofnunnar og náttúruverndarsamtökum.

Í frumvarpsdrögunum eru þær breytingar gerðar á núgildandi lögum að áhættumat erfðablöndunar verði fær frá Hafrannsóknarstofnun til ráðherra, áður hafi þó mat Hafrannsóknarstofnunar verið bindandi fyrir ráðherra. IWF segir algjörlega óásættanlegt að áhættumatið verði gert pólitískt með þessum hætti.

Merki samtakanna IWFFacebook/IWF

Fyrirkomulag samráðsvettvangs fráleitt

Einnig gagnrýna samtökin þær áætlanir að ráðherra skipi samráðsvettvang sem eigi að vera stjórnvöldum til ráðgjafar vegna málefna fiskeldis. IWF segir að ekki sé gert ráð fyrir vísindafólki í samráðsvettvangnum til að rýna í fræðilegar niðurstöður og gögn.

Í drögum að frumvarpinu segir „Þrír fulltrúar skulu skipaðir án tilnefningar og er einn þeirra formaður, einn samkvæmt tilnefningu Hafrannsóknastofnunar, einn samkvæmt sameiginlegri tilnefningu fiskeldisstöðva, einn samkvæmt tilnefningu Landssambands veiðifélaga og einn samkvæmt tilnefningu Sambands íslenskra sveitarfélaga.“

IWF segir fyrirkomulagið fráleitt og segir að hópur sem þessi, með þetta hlutverk, ætti að vera skipaður hlutlausu vísindafólki.

Samtökin saka ráðherra um að ætla að láta undir þrýstingi sjókvíeldisfyrirtækjanna og hækka þröskuld áhættumatsins, þvert á viðvaranir vísindamanna. Samtökin segja enn fremur að óásættanlegt sé að nokkur einasti norski eldislax gangi í íslenskar ár, því muni samtökin berjast gegn frumvarpinu með öllum tiltækum ráðum.




Tengdar fréttir

Stefnir að frumvarpi um fiskeldi á þessu þingi

Sjávarútvegs- og landbúnaðarráðherra segir úrskurði sem fella úr gildi rekstrarleyfi tveggja fiskeldisfyrirtækja til sjókvíaeldis á Vestfjörðum gefa tilefni til að endurskoða regluverk um leyfisveitingar. Hann stefnir á að leggja fram frumvarp að lögum um fiskeldi í vetur. Málið er í algjörum forgangi hjá Matvælastofnun og fyrirtækin hafa óskað eftir frestun réttaráhrifa.

Umdeild mál ekki leyfð á veggjum Leifsstöðvar

Auglýsingaskilti um íslenska laxastofninn fær ekki að hanga uppi í Leifsstöð þrátt fyrir breytingar og úrskurð siðanefndar. Isavia vill ekki umdeild mál á veggjum flugstöðvarinnar. Talsmaður segir málið snúast um tjáningarfrelsi.




Fleiri fréttir

Sjá meira


×