Aprílspá Siggu Kling – Krabbinn: Þú þarfnast öryggis í ástarmálum

Elsku Krabbinn minn, þú ert svo skemmtilega ímyndunarveikur að það á eftir að lita líf þitt og setja á þig svo skemmtilegan glans. Annaðhvort ertu svo orðheppinn og snjall í orðaleikjum eða frábær penni og allt þar á milli.

Í öllum þessum krafti áttu það til að verða ofsahræddur og festast í þeirri vitleysu, en þú hristir alltaf jafn mikið höfuðið á því að þú hafir í raun og veru misst kraftinn vegna ímyndaðra áhyggja. Þú þarft að taka allt áhyggjusorp úr huganum á þér, setja það út í tunnu með ruslinu og „med det samme“ ferðu að blómstra á ný.

Þú þarfnast öryggis í ástarmálum og þegar eða ef þú hefur fundið það þá skaltu ekki sleppa takinu og þú munt alltaf finna það í hjarta þínu hvað er rétt og hvað er rangt í þeim málum og ef þú finnur til óöryggis eða hræðslu þá er það svo sannarlega ekki ástin þín. Ekki horfa í baksýnisspegilinn með nokkurn skapaðan hlut tengdan ástarmálum og hafðu það að leiðarljósi að tala vel um allt og alla og sérstaklega þá sem þú elskar því það magnar upp styrkleika sambandsins.

Þú skalt halda eins mörg partý og þú getur og taka þátt í hverjum þeim gleðskap sem þér býðst og af öllu hjarta. Það er að mæta þér svo skrautlegur tími með eitthvað svo öðruvísi upplifun sem gefa þér þann kraft til að vera svo stoltur af þér og því sem þú ert að framkvæma. Þú hefur svo beinskeyttan og skemmtilegan húmor, alls ekki fara að ritskoða hann því hann gerir kaflana í þessari lífsögu þinni svo miklu skemmtilegri.

Þú átt eftir að skipuleggja svo margt skemmtilegt og þó að allt gerist ekki þá verða aðalatriðin í höfn og þetta sumar færir þér sigurinn, það er allt svo gott!

Knús og kossar, þín Sigga Kling

Frægir Krabbar: Bryndís Schram, Sigga Lorange Ostabúðarskvísa, Auddi Blö, sem við elskum öll, Dagur B. Eggertsson, borgarstjóri og dúlla, Ólafur Stefánsson, handboltakappi og heimspekingur, Edda Sif, Sindri Sindrason, Ásdís Halla Bragadóttir, Hjörvar Hafliðason og Lars Lagerbäck landsliðsþjálfari, Davíð hinn góði skóari í Hafnafirði, Stefán Árni Pálsson fréttamaður, Guðni Th. forseti Íslands, Friðbjörn Europartakóngur, Yesmine Olsen, höfundur og framleiðandi, George Michael, Kristófer Helgason, dagskrágerðamaður, Nuno Alexandre Bentin Servo veitingahúsakóngur, Helga Hafsteinsdóttir, hárgreiðsluséní á Akureyri, Íris Björk Tanya frumkvöðull og hönnuður, Liga Liepina hestaljósmyndari.