Ráðast í heildarúttekt til að sefa áhyggjur foreldra

Bæjarstjórn Mosfellsbæjar samþykkti einróma í gær að framkvæma skoðun á öllu skólahúsnæði sveitarfélagsins með tilliti til rakaskemmda og hugsanlegs örveruvaxtar. Um er að ræða alla grunnskóla og leikskóla sveitarfélagsins en ef fram kom merki um örveruvöxt í þeirri skoðun verður strax gerð áætlun um úrbætur og ráðist í þær.

„Þrátt fyrir þær þrjár úttektir sem Efla hefur gert á húsnæði Varmárskóla og úrbætur í kjölfar þeirra eru enn uppi efasemdir í skólasamfélaginu í Mosfellsbæ um að nóg sé að gert. Því er mikilvægt að fyrsta verkefni tengt þessari skoðun verði að ráðast í heildstæða úttekt á Varmárskóla og mæla loftgæði þannig að ekki leiki vafi á að húsnæði skólans mæti kröfum sem gerðar eru til skólahúsnæðis,“ segir í fundargerð bæjarstjórnar Mosfellsbæjar um málið.

Haraldur Sverrisson, bæjarstjóri Mosfellsbæjar, segir í samtali við Vísi þessa úttekt gerða vegna þeirrar umræðu sem hefur verið um þessi mál að undanförnu þar sem rakaskemmdir hafa fundist í hverjum skólanum á höfuðborgarsvæðinu á fætur öðrum. Foreldrar í Mosfellsbæ höfðu lýst yfir áhyggjum um stöðu mála.

„Við viljum vera hundrað prósent viss um að okkar skólahús séu í lagi. Við látum fólkið og skólasamfélagið njóta vafans,“ segir Haraldur.

Heilmikil umræða hefur verið um Varmárskóla undanfarið en Efla hafði áður framkvæmt skoðanir á húsnæði skólans sem leiddi í ljós örveruvöxt á þremur afmörkuðum stöðum sem ráðist var í úrbætur á.

Engu að síður ætlar bærinn að gera frekari úttekt á Varmárskóla ásamt hinum grunnskólum bæjarins og leikskólum.