Ungur ökumaður reyndi að stinga lögregluna af

Lögreglan á höfuðborgarsvæðinu varð að elta ökumann á Reykjanesbraut eftir að hann sinnti ekki stöðvunarmerkjum hennar. Ungi maðurinn ók á 115 km/klst þegar lögreglan gaf honum merki um að stöðva bifreiðina. Í eftirför lögreglu mældist bifreiðin á yfir 200 km/klst auk þess sem ökumaðurinn ók yfir gatnamót á móti rauðu ljósi. Það var síðan á Kalárselsvegi sem ökumaðurinn stöðvaði bifreiðina.

Ökumaðurinn er 17 ára gamall og var vistaður í fangageymslu lögreglu fyrir rannsókn málsins. Hann er grunaður um eignaspjöll, að fara ekki að fyrirmælum lögreglu og ofbeldi gegn opinberum starfsmanni. Þetta kemur fram í dagbók lögreglunnar á höfuðborgarsvæðinu.

Lögregla hefur greint föður ökumannsins frá málinu auk þess sem tilkynning var send til Barnaverndar.