Nóg að gera hjá Gæslunni vegna báta á sjó

Það hefur verið nóg að gera hjá stjórnstöð Landhelgisgæslunnar það sem af er degi að því er fram kemur í tilkynningu frá Gæslunni.

Laust fyrir klukkan ellefu í morgun barst tilkynning um að eldur væri laus í strandveiðibáti sem staddur var á veiðum út fyrir Patreksfirði. Var þyrla Landhelgisgæslunnar kölluð út ásamt björgunarbátum á svæðinu. Auk þess voru bátar í grenndinni beðnir um að halda á staðinn.

Skömmu síðar varð ljóst en engin hætti væri á ferðum og var því aðstoð viðbragðsaðila afturkölluð. Báturinn sigldi fyrir eigin vélarafli til Patreksfjarðar.

Aðeins tæpum tuttugu mínútum síðar, eða klukkan 11:16, barst annað neyðarkall frá strandveiðibáti og var aftur tilkynnt um eld um borð.

„Stjórnstöð Landhelgisgæslunnar kallaði þyrluna út enn á ný. Báturinn var á veiðum nærri Grímsey en sá sem var um borð náði sjálfur að slökkva eldinn. Aðstoð þyrlunnar var afturkölluð og báturinn sigldi fyrir eigin vélarafli til Grímseyjar.

 

Á öðrum tímanum í dag barst beiðni um aðstoð frá vélarvana báti sem staddur var úti fyrir Seyðisfirði. Björgunarsveitin á Seyðisfirði var kölluð út og er komin á staðinn. Þá barst sömuleiðs tilkynning frá vélarvana báti úti fyrir Patreksfirði skömmu fyrir klukkan 15 í dag. Stjórnstöðin hafði samband við nálæga báta og hélt einn til aðstoðar. Sjósókn er nokkuð góð en um 500 skip og bátar eru nú í fjareftirlitskerfum Landhelgisgæslunnar,“ segir í tilkynningu.