Mannbjörg varð þegar eldur kom upp í bát á Héraðsflóa

Mannbjörg varð þegar eldur kom upp í bát á Héraðsflóa á Norðausturlandi á þriðja tímanum í dag. Stjórnstöð Landhelgisgæslunnar barst neyðarboð frá bátnum en samkvæmt fyrstu upplýsingum var báturinn sokkinn. Einn var um borð í bátnum og tókst honum að komast í björgunarbát að því er fram kemur í tilkynningu frá Landhelgisgæslunni.

TF-SYN, þyrla Landhelgisgæslunnar, var við leit á Melrakkasléttu þegar tilkynning um slysið barst og var áhöfn hennar þegar í stað beðin um að halda á vettvang. Rétt rúmum hálftíma eftir að TF-SYN var kölluð út var var búið að hífa manninn um borð í þyrluna, úr björgunarbátnum.

Aðstæður til björgunar á Héraðsflóa voru góðar og var maðurinn við góða heilsu. Þegar þyrlan hélt af vettvangi logaði enn eldur í bátnum. TF-SYN flutti manninn til Egilsstaða og lenti þar fyrir stundu.