Tvær fjölskyldur af indverskum ættum í bílnum

Fjölskyldur tveggja bræðra voru í bílnum sem fór út af brúnni yfir Núpsvötn í morgun. Fólkið er af indverskum ættum en búsett á Bretlandi og með breskan ríkisborgararétt. Tveir fullorðnir og ungt barn fórust í slysinu.

Indverska sendiráðið staðfesti þjóðerni fólksins. Auk þeirra sem létust eru tveir fullorðnir og tvö börn, sjö og níu ára gömul, alvarlega slösuð.

Jeppi þeirra af gerðinni Toyota Land Cruiser fór fram af brúnni yfir Núpsvötn og steyptist niður í áraurana í morgun. Bifreiðin var hífð upp og flutt á Selfoss þar sem klippa átti tvo þeirra látnu úr henni.

Loka þurfti þjóðvegi 1 um tíma vegna slyssins í dag en umferð var hleypt á brúna aftur nú síðdegis.