Landsliðsmarkvörður skiptir um lið á Íslandi

Emma Higgins hefur gengið frá eins árs samningi við nýliða Selfoss og mun því spila með liðinu í Pepsi-deildinni í sumar.

Emma Higgins er markvörður norður-írska landsliðsins. Hún gekk fyrst í raðir Grindavíkur árið 2010 og hefur leikið þar stærstan hluta ferilsins.  

Higgins lék einnig með KR í Pepsi-deildinni árið 2012 og með Doncaster Rovers Belles í Englandi árið 2013. Hún sneri svo aftur til Grindavíkur sumarið 2014.

Selfoss verður því þriðja íslenska félagið sem Higgins spilar fyrir í Pepsi-deildinni.

„Emma býr yfir mikilli reynslu og þekkingu á sinni stöðu og smellur vel inn í hópinn hjá okkur. Hún kom með okkur í æfingaferð til Spánar fyrir páska og sýndi þar hvað í henni býr auk þess sem hún hefur spilað með okkur í Lengjubikarnum og staðið sig vel,“ sagði Alfreð Elías Jóhannsson, þjálfari Selfoss, í viðtali í fréttatilkynningu.

Emma Higgins er 31 árs gömul (verður 32 ára í maí) og hefur leikið 79 landsleiki fyrir Norður-Írland síðan hún lék sinn fyrsta landsleik árið 2004. Hún hefur meira segja skorað eitt mark fyrir landsliðið. Higgins var einnig valin í Ólympíuhóp Breta fyirr leikana í London 2012.

„Það er ótrúlega gott fyrir okkur að fá leikmann eins og hana inn í hópinn okkar. Hún er frábær karakter og smitar út frá sér til yngri leikmanna bæði í leikjum og á æfingum. Það er það sem við þurfum fyrir okkar unga og efnilega lið,“ segir Alfreð Elías.