Magakveisa ástæðan fyrir slæmri byrjun Noregs á EM?

Norska kvennalandsliðið í handknattleik tryggði sér í dag 5.sætið á Evrópmótinu í eftir stórsigur á Svíþjóð. Árangurinn er töluvert undir væntingum en slæm byrjun á mótinu gerði það að verkum að ekki gekk betur. Nú gæti verið komin ástæða fyrir slæmri byrjun á mótinu.

Noregur hefur verið eitt af bestu liðunum í kvennahandboltanum í áraraðir og meðal annars unnið sex Evróputitla frá árinu 2004. Það eru því vonbrigði að liðið hafi aðeins náð 5.sæti á mótinu í Frakklandi þrátt fyrir að lykilmenn hafi verið frá vegna meiðsla.

Í samtali við TV2 í Noregi greinir læknir norska liðsins, Nils Ivar Leraand, frá því að veikindi hafi sett strik í reikninginn hjá liðinu fyrir mótið.

„Það voru sjö leikmenn sem fengu niðurgang og uppköst, sem betur fer ekki fleiri. Líklega veiktust þær vegna einhvers sem þær átu," sagði Leraand í samtali við TV2.

Noregur beið lægri hlut gegn Þýskalandi í fyrsta leik mótsins og tapaði einnig fyrir Rúmeníu í riðlinum. Þær fóru því án stiga í milliriðilinn en voru samt sem áður aðeins einu marki frá því að tryggja sér sæti í undanúrslitum.

„Veikindin höfðu líklega áhrif á nokkra leikmenn í fyrsta leiknum," bætti Leraand við en Þórir Hergeirsson vill ekki afsaka sig á sama hátt.

„Það er auðvelt að nefna eitthvað svona sem ástæðu fyrir því að við vorum ekki á tánum í upphafi mótsins. Ég vill ekki gera það. Ég vill horfa faglega á þetta og fyrst fá að heyra hvað leikmannahópurinn, þjálfarateymið og einstakir leikmenn hafa að segja áður en ég tjái mig um ástæðuna fyrir tapinu gegn Þýskalandi," sagði Þórir.