Jón Axel frábær í fjórða sigri Davidson í röð

Körfuknattleikskappinn Jón Axel Guðmundsson átti heldur betur góðan leik í nótt þegar hann og félagar hans í Davidson háskólanum unnu fjórða sigur sinn í röð með því að leggja Wilmington að velli á útivelli, 85-91.

Jón Axel var stigahæstur í liði Davidson með 25 stig auk þess að taka 7 fráköst og gefa 8 stoðsendingar.

Davidson leiddi með fimm stigum í leikhléi en misstu forystuna fljótlega í síðari hálfleik. Þeir náðu hins vegar að koma til baka á lokakafla leiksins og vinna næsta öruggan sigur.

Jón og félagar hafa spilað vel í vetur þar sem liðið hefur unnið sjö leiki og aðeins tapað einum.