Vill framlengja um eitt ár við sérfræðilækna

Svandís Svavarsdóttir heilbrigðisráðherra vill framlengja rammasamning við sérfræðilækna sem rennur út um áramótin um eitt ár. Þetta segir Svandís í samtali við fréttastofu. Hún vill nýta næsta ár til þess að búa til nýjan heilstæðan samning við sérfræðilækna.

Um er að ræða viðbrögð ráðherra við nýföllnum dómi héraðsdóms um samning Sjúkratrygginga Íslands og sérgreinalækna. Héraðsdómur Reykjavíkur felldi í síðustu viku úr gildi ákvörðun Sjúkratrygginga að hafna umsókn Ölmu Gunnarsdóttur sérfræðilæknis um aðild að samningnum. Var íslenska ríkinu gert að greiða 1,8 milljónir króna í málskostnað en átta sérfræðilæknar stóðu að baki málsókninni sem höfuð var í nafni Ölmu.

Var það niðurstaða héraðsdóms að heilbrigðisráðherra hefði brotið lög með fyrirmælum sem rekja má til desember 2015 þegar Kristján Þór Júlíusson, þáverandi heilbrigðisráðherra, ákvað að loka samningi Sjúkratrygginga og sérgreinalækna í desember 2015.

Formaður samninganefndar sérfræðilækna hjá Læknafélagi Reykjavíkur gagnrýndi ráðherra á dögunum fyrir hæg viðbrögð við þeim samningi sem væri að renna út.

„Þetta er mjög alvarlegt því við erum auðvitað farin að skipuleggja þjónustu við sjúklinga langt fram á næsta ár og það liggur í dag ekki fyrir hvort að sú þjónusta verði með greiðsluþátttöku ríkisins eða ekki,“ sagði Kristján Guðmundsson, formaður samninganefndar sérfræðilækna hjá Læknafélagi Reykjavíkur.

„Við þurfum að tilkynna fyrir 1. október hvort við ætlum að vinna á samningnum, mánuð fyrir mánuð, eftir áramót. Við lítum svo á að það sé nánast óvinnandi vegur að vinna að svona viðamikilli starfsemi frá mánuði til mánaðar og það verður einfaldlega að koma skýr svör frá ráðherranum hvort það eigi að hefja einhverjar viðræður við okkur og þá við hverja og um hvað.“

Framlengja með skýrri framkvæmd

Svandís kynnti hugmyndir sínar um framtíðarfyrirkomulag við kaup á þjónustu sérgreinalækna á fundi í Velferðarráðuneytinu í dag. Fulltrúar Samtaka heilbrigðisfyrirtækja, Læknafélags Íslands, Sjúkratryggina Íslands, Læknafélags Reykjavíkur, Landspítala, Sjúkrahússins á Akureyri, Heilsugæslu höfuðborgarsvæðisins og fulltrúar allra heielbrigðisumdæma landsins sóttu fundinn.

„Fyrst og fremst vorum við á fundinum í dag að ræða nokkur atriði. Í fyrsta lagi viðbragðið við dómnum. Við vorum að ræða það hvernig við þyrftum að bregðast við í framhaldinu. Ég var að ræða það að í ljósi þess að við þurfum að vita nákvæmlega á hvaða leið við erum, að þá þyrftum við að framlengja samninginn með skýrri framkvæmd. Það er að segja að það yrði ljóst að það væri metið hverjir ættu að vera inn á honum og hverjir ekki.

Í þriðja lagi ræddum við ýmsar leiðir varðandi framtíðarfyrirkomulag og skiptumst á skoðunum við borðið,“ segir Svandís.

Hún segir fundinn ekki eingöngu hafa snúist um svokallaða stofulækna. Einnig hafi verið rætt um sérfræðilækna hjá stofnunum eins og Landspítalanum og heilsugæslunni.