Vakti heimsathygli þegar hún dýfði djúpsteiktum kjúklingi í kók í beinni

Alexa Greenfield er í raun orðin heimsfræg eftir að sást til hennar dýfa djúpsteiktum kjúklingi ofan í kókglas áður en hún tók bita.

Atvikið átti sér stað á Opna bandaríska meistaramótinu í Tennis og sást það í beinni sjónvarpsútsendingu.

Greenfield ræddi málið við FOX 5 sjónvarpsstöðina. „Ég fékk sms fimm mínútum síðar frá vini mínum sem sagðist hafa séð mig dýfa kjúklingi ofan í kókglas í beinni útsendingu og ég hugsaði strax, ó nei.“

Hún segist alltaf hafa gert þetta sem barn og ákveðið að prófa þetta aftur á mótinu.

„Ég geri þetta stundum þegar ég er á íþróttaleikjum. Ég sagði við frændur mína að ég ætlaði að sýna þeim svolítið sem ég gerði stundum og bað þá um að segja ekki foreldrum sínum frá. Ég sagði þeim að þetta væri mjög skrýtið og ég skammaðist mín töluvert fyrir þetta. Svo var ég bara gómuð í beinni.“

Alexa viðurkennir að það sé mjög skrýtið að dýfa kjúklingi í kók.

„Ég hef alltaf borðað mjög einkennilega og fólk er núna að segja við mig að ég ætti að fara í fangelsi.“