Ekki sama hvað er auglýst?

Baráttusamtök gegn sjókvíaeldi segja ISAVIA skerða tjáningarfrelsi með því að taka niður auglýsingu þeirra í innritunarsal Keflavíkurflugvallar. Upplýsingafulltrúi ISAVIA segir auglýsinguna hins vegar setta upp í leyfisleysi auk þess sem vinnureglur banni slíkan boðskap í flugstöðinni.

Fjallað var um málið í Fréttablaðinu í morgun, en auglýsingin var sett upp af umhverfisverndarsamtökunum Icelandic Wildlife Fund. Í auglýsingunni segir m.a. að alþjóðleg fyrirtæki vilji stórauka umfang sjókvíaeldis í íslenskum fjörðum, sem hafa muni alvarlegar afleiðingar fyrir umhverfið. Þetta þurfi að stöðva. Auglýsingin fékk að standa í tíu daga en var svo tekin niður.

„Þessi auglýsing var sett upp í flugstöðinni í leyfisleysi og þess vegna er hún tekin niður. Auglýsingar í flugstöðinni eru bornar undir starfsmenn ISAVIA og það er samkvæmt reglum,“ segir Guðjón Helgason, upplýsingafulltrúi ISAVIA.

Talsmaður samtakanna telur þessar skýringar heldur rýrar í roðinu og kannast ekki við slíkar reglur.

„Og við skulum athuga það að fyrirtækið sem gekk frá auglýsingunni, framleiddi hana og hengdi hana upp í Leifsstöð gerði það að sjálfsögðu í samráði við ISAVIA. Það var starfsmaður frá ISAVIA á staðnum og auglýsingin var uppi í tíu daga,“ segir Jón Kaldal, talsmaður Icelandic Wildlife Fund.

Guðjón segir um vinnureglur að ræða, en ekki skráða reglugerð. Samkvæmt vinnureglunum eigi eingöngu að auglýsa vörur og þjónustu í flugstöðinni en ekki einhvers konar málstað.

„Það er líka þessi áhersla á að það sé ekki verið að vega að einstaklingum, starfsemi eða fyrirtækjum eða eitthvað slíkt,“ segir Guðjón.

„Ef koma fram einhverjar athugasemdir þá er það yfirleitt frá þeim sem telja á sér brotið í auglýsingum. Þarna var það ekki, þarna er engin hatursorðræða og við beinum ekki skilaboðunum gegn tilteknu fyrirtæki,“ segir Jón.

Hann segir þær upplýsingar sem birtast í auglýsingunni byggja á viðurkenndum rannsóknum, rétt eins og ef talað væri fyrir minnkuðum útblæstri eða annars konar umhverfisvernd. Aðhald í þessum málaflokki sé sífellt mikilvægara samhliða því sem sjókvíaeldi vaxi fiskur um hrygg.

„Það er náttúrulega mjög alvarlegur flötur á þessu máli að félag sem er 100% í eigu ríkisins sé í rauninni að skerða tjáningarfrelsi grasrótarsamtaka eins og Icelandic Wildlife Fund,“ segir Jón.

„Við teljum þetta ekki vera spurningu um eitthvað slíkt, þetta eru bara vinnureglur sem við höfum og þetta sé spurningum auglýsingar fyrir vöru og þjónustu – en ekki málstaði,“ segir Guðjón.

Samtökin hafa vísað málinu til siðanefndar Sambands íslenskra auglýsingastofa og er niðurstöðu að vænta í næstu viku.