Stjörnuspá Siggu Kling – Steingeitin: Leysir vandamál annarra á ljóshraða

Elsku Steingeitin mín, traustari vin en þig er ekki hægt að finna og heldur ekki erfiðari óvin. Þú ert með svo sterka póla eins og svart og hvítt, og þrjóska er aðaleinkenni þitt. Það og sú þrjóska getur bæði leitt til góðs og ills, til dæmis þú lemjir þig áfram og að finnast ekkert alveg nógu gott sem þú gerir.

Eina fólkið sem ég get virkilega stólað á er nákvæmlega fólk í þessu merki því það sem þú segir er endanlegt og þú hefur þá hreinskilni og umhyggju að segja nákvæmlega sannleikann við aðra, þó ekki allir vilji heyra hann. En ég treysti alltaf best á þig elsku Steingeitin mín því þú leysir vandamál annarra á ljóshraða en átt svo oft erfitt með að leysa þín eigin.

Skyndikynni freista þín kannski en skilja núll tilfinningar eftir, þú verður að standast freistingar hvort sem það eru hugbreytandi efni eða manneskjur. Það er svo sannarlega hægt að segja að þú sért rosalegur magnari á öllu sem þú tekur þér fyrir hendur, hefur leikræna tjáningu sem kemur þér langt en ef þú lýgur þá festistu í vitleysu og verður að nota hreinskilni og einlægni til að koma þér út úr því.

Þú nærð mestum árangri með því að vinna með karlkyns einstaklingum hvort sem þú ert karl eða kona, segðu í upphafi hvort sem það er vinna eða að kynnast nýju fólki hvað það er sem þú vilt, ekki bíða eða fresta til að tjá þig um það því þá heltekur og drepur kvíðinn þig. Því að þótt kvíði sé eðlileg tilfinning er ástæðulaust að magna hann upp. Þú munt upplifa í næsta mánuði hvað fólk lítur upp til þín og treystir þér svo nýttu þér það og reyndu að skilja að þú ert margfalt sterkari en þú gerir þér grein fyrir.

Setningin þín er: Ég er sterk og verð sterkari með hverju augnabliki

Frægar Steingeitur: Guðjón Pétur Lýðsson markakóngur, Svava Johansen í Sautján, Ingibjörg Sólrún Gísladóttir, dr. Kristín Ólafsdóttir og Davíð Oddsson, Jón Gnarr, Elvis Presley, Gunnar Þórðarson, Tómas Guðbjartsson læknahetja, Lovísa Tómas, Dorrit Moussaieff forsetafrú, Þuríður Blær Jóhannsdóttir, leikkona og Reykjavíkurdóttir, Jesús og Simmi á Fabrikkunni, Óttar Proppé, Ingveldur Ægissdóttir módir og kvunndagshetja, Hendrika Waage hönnuður, Laddi, Jóhann K. Jóhannsson fréttamaður.