Katrín Tanja í fjórða sæti en Anníe og Björgvin Karl í fimmta

Katrín Tanja Davíðsdóttir er efst íslensku keppendanna á heimsleikunum í Crossfit sem fara fram í tólfta skipti. Keppt er í Madison í Bandaríkjunum.

Þriðji keppnisdagurinn fór fram í gær en áður en að leikar hófust í gær voru allir fimm íslenskir keppendurnir í eldlínuni.

Greinarnar í gær voru tvær en eftir fyrri greinina var Katrín Tanja komin í þriðja sætið yfir heildarlistann og var í góðum möguleika fyrir síðari grein dagsins.

Í síðari greininni var Katrín lengst af í forystu en eftir að hafa fengið upphýfingu dæmda ógilda riðlaðist aðeins plan hennar og endaði hún á að taka þriðja sætið í sínum riðli.

Hún er í fjórða sætinu í heildarkeppninni og fast á hæla hennar er Anníe Mist en hún kláraði sjöunda í síðari greininni í gær. Anníe er í fimmta sæti samanlagt en 42 stigum munar á Anníe og Katrínu.

Ragnheiður Sara Sigmundsdóttir hætti keppni í gær eftir fyrri greinina en hún er að glíma við meiðsli. Oddrún Eik Gylfadóttir er í 23. sæti heildarlistans.

Í karlaflokki er okkar eini keppandi Björgvin Karl Guðmundsson í fínum málum. Hann er í fimmta sætinu með 656 og eru ekki nema rúm hundrað stig upp í annað sætið en lokadagurinn fer fram í dag.

Hann var í fimmta sæti í sínum undanriðli í síðari grein gærdagsins og var í níunda sæti yfir alla keppendur. Því fékk hann dýrmæt stig.

Beina lýsingu frá keppninni í gær má lesa hér en áfram verður vel fylgst með gangi mála á Vísi í dag.