Nýr fríverslunarsamningur undirritaður við Ekvador

Nýr fríverslunarsamningur á milli EFTA-ríkjanna og Ekvador var í morgun undirritaður á Hólum í Hjaltadal.

Hinum nýja samningi er ætlað að létta hindrunum, auðvelda viðskipti og fjárfestingar á milli Ekvador og aðildarríkja Fríverslunarsamtaka Evrópu.

Helstu útflutningsvörur Ekvador eru ávextir og grænmeti, en auk þess gull, kakóvörur, rósir, fiskiolíur, rækjur og önnur sjávarföng að því er fram kemur í fréttatilkynningu frá ráðuneyti utanríkisviðskipta Ekvador.

Í samningnum er kveðið á um markaðsaðgengi fyrir vörur og þjónustu, upprunamerkingar, hollustuhætti og afnám tæknilegra hindrana í milliríkjaviðskiptum.

Pablo Campana, ráðherra utanríkisviðskipta í Ekvador, segir að samningurinn sé  mikilvægur fyrir alla þá sem eigi í hlut. Með undirrituninni hafi orðið til viðskiptasamband til framtíðar.

„Samningurinn við EFTA opnar nýtt markaðssvæði fyrir nær allar útflutningsvörur Ekvador, markaðssvæði sem telur um 14. milljónir íbúa.“