Verndum Geldinganesið

Í dag er Geldingarnesið skipulagt sem þróunarsvæði, þó að öll strandlínan, frá Blikastaðakró umhverfis Geldinganesið sé undir hverfisvend. Fyrir mörgum árum var aðeins hægt að komast út á Geldinganesið yfir náttúrulegt malarrif á fjöru, en árið 1999 var gerð upphækkun vegna fyrirhugaðs grjótnáms á nesinu og gerður ökuslóði yfir fyrir vörubíla. Í dag er þessi slóði til staðar en ekki fyrir alla að fara þarna yfir. Það mætti bæta við stígum, svo gangandi og hjólandi vegfarendur eigi auðveldara með að komast yfir og geti notið þess sem Geldinganesið býður upp á.

Grænt svæði

Geldinganesið er ónýtt náttúruperla og yndislegt útivistarsvæði sem á sér sögu. Þarna má finna sjótóftir á austanverðu nesinu og skipsflak á sunnanverðu nesinu. Sögusagnir eru um að einsetukona hafi búið þar og svo var svæðið áður fyrr útigangs svæði fyrir dýr og jafnvel verið aðsetur fyrir sauðhirði á Geldinganesi. Margt er því hægt að byggja á ef svæðið yrði opnað sem útivistar og leiksvæði.

Í núverandi aðalskipulagi er Geldinganesið skilgreint sem opið svæði. Þetta er viðurkennt hundasvæði, þarna er kayak-klúbbur með aðsetur og sumir nýta þetta sem útivistarsvæði. Með því að bæta aðgengið væri hægt að opna nesið fyrir fleiri til að njóta þeirrar náttúruparadísar sem Geldinganesið er. 

Undirritaður sá á einum stað skrifað, hversu notalegt það var að ganga yfir á Geldinganesið til þess að kúpla sig út úr amstri borgarinnar og njóta þess að horfa á borgina frá nesinu með hávaðamengun í fjarska. Því ekki að gera Geldinganesið meira aðlaðandi fyrir okkur sem búum í borginni, sem grænt svæði með göngustígum og bekkjum

Útivist og tómstundir

Tilvalið er að setja upp útsýnispall á nesinu sem vísar til borgarinnar. Þarna er hægt að vera með afmarkað hundagerði og ruslastampa í kring. Tækifæri eru að búa til aðlaðandi aðkomu og aðstæður fyrir tómstundaklúbba eins og t.d. kayak-klúbbinn, hjólaklúbba, gönguhópa og svo marga fleiri sem myndu vilja nýta sér heilsueflandi útivist á grænum stað.

Ströndin hefur gríðarmikið verndargildi vegna náttúru og fuglalífs, enda ein lengsta ósnerta strandlengja höfuðborgarsvæðisins. Það er mikilvægt að við stækkum það svæði sem friðlýsingin nær til. Við verðum að koma sem mestu af einstakri náttúru svæðisins í skjól fyrir uppbyggingu og ég vil beita mér gegn því að skipulagt verði stórt úthverfi í nesinu. Þess í stað vil ég að það verði varðveitt fyrir börnin okkar sem framtíðarútivistarsvæði Grafarvogsbúa.

Með einföldum hætti væri hægt að gera nesið mjög ákjósanlegan áningarstað fyrir svo marga sem eiga leið fram hjá í sínum frítíma í samstarfi við þá sem vilja nýta sér svæðið. Íbúar í hverfinu og útivistarklúbbar gætu notið svæðisins væri það hugsað sem opin náttúruparadís!

Höfundur er varamaður í hverfisráði Grafarvogs og skipar 13 sæti á framboðslista VG fyrir borgarstjórnarkosningarnar.