ÍA biður Guðrúnu afsökunar

Magnús Guðmundsson, formaður knattspyrnudeildar ÍA, segir félagið þegar á árinu 2014 hafa horfst í augu við fortíðina og reynt sem allra best að draga lærdóm af því sem betur mátti fara í ofbeldismáli leikmanns félagsins, Marks Doninger, gegn kærustu hans Guðrúnu Dögg Rúnarsdóttur árið 2011.

Til að læra af erfiðri reynslu var í framhaldinu sett af stað vinna á vegum félagsins við að útbúa viðbragðsáætlun. Niðurstaðan var að setja á fót sérstakt fagráð sem hefur það meginhlutverk að vera álitsgjafi vegna alvarlegra agavandamála.

Guðrún Dögg sagði í viðtali við helgarblað Fréttablaðsins sögu sína um ítrekað ofbeldi sem hún varð fyrir af hendi þáverandi kærasta síns á meðan hann starfaði sem knattspyrnumaður hjá ÍA. Félagið breytti að hennar mati ekki rétt í málinu.

Sjá einnig: Þórður segir að ÍA hafi reynt að losa sig við Mark eftir árásina

„Við hjá ÍA fullyrðum að við munum vinna hlutina allt öðruvísi komi viðlíka mál upp hjá okkur í framtíðinni en auk þess hefur umræðan í samfélaginu haft þau áhrif að við eru almennt betur undirbúin að taka á erfiðum málum. Það skiptir miklu máli að taka svona mál alvarlega og að hvers konar ofbeldi, áreitni eða óæskileg hegðun verður alls ekki liðin hjá félaginu,“ segir Magnús.

Fram undan er vinna við að fræða starfsmenn og leikmenn.

„Við höfum á síðustu mánuðum farið yfir okkar mál með Knattspyrnusambandi Íslands, Íþróttasambandi Íslands sem og Akraneskaupstað og á næstu vikum munum við fræða alla okkar starfsmenn og þjálfara um ofbeldi sem þetta í samvinnu við Bjarkarhlíð, miðstöð fyrir þolendur ofbeldis, sem sérhæfir sig í að veita stuðning og ráðgjöf ásamt fræðslu og umfjöllun um eðli og afleiðingar ofbeldis,“ bætir Magnús við.

Mark Doninger lék alls þrjátíu leiki fyrir ÍA árin 2011 og 2012.

„Knattspyrnufélagið harmar framangreint mál og lítur það mjög alvarlegum augum en það reyndist öllum sem að því komu mjög viðkvæmt og erfitt og ég vil fyrir hönd félagsins enn og aftur biðja Guðrúnu Dögg og fjölskyldu hennar afsökunar. Stefna okkar gegn einelti, kynferðislegri áreitni, ofbeldi og annarri ótilhlýðilega háttsemi er skýr og við munum fylgja henni í framtíðinni,“ undirstrikar Magnús. 

Úr Hæstaréttardómi yfir Mark Doninger

„Fyrir líkamsárás á […], aðfaranótt sunnudagsins 22. maí 2011, á skemmtistaðnum [...] með því að hafa kýlt [...] einu hnefahöggi með krepptum hnefa í andlitið á vinstri kjálkann þannig að hún féll niður á „poolborð“ sem hún sat á, og fyrir að hafa gert atlögu að henni fyrir utan skemmtistaðinn stuttu síðar, með því að henda henni í götuna, rífa í hár hennar og ýta henni ítrekað niður er hún reyndi að reisa sig við, með þeim afleiðingum að hún hlaut mar og bólgu á kjálkabeini vinstra megin, mar og yfirborðsáverka á hné og fótlegg og tognun á ökkla.“

[...]

„Fyrir líkamsárás á [...], aðfaranótt sunnudagsins 30. október 2011, á heimili ákærða [...] með því að hafa ráðist á […], dregið hana á hárinu inn í svefnherbergi þar sem hann henti henni upp í rúm, settist ofan á hana og sló hana utan undir, tók um munn hennar og nef með þeim afleiðingum að hún átti erfitt með andadrátt og að því loknu skallað hana í andlitið þannig að enni hans lenti á munni hennar allt með þeim afleiðingum að hún hlaut yfirborðsáverka í andliti og á hálsi og að báðar varir hennar sprungu þannig að úr blæddi.“