Gæsluvarðhald framlengt um tvo daga vegna Skáksambandsmáls

Gæsluvarðhald yfir Sigurði Inga Kristinssyni var framlengt um tvo daga í Héraðsdómi Reykjavíkur í dag. Sigurður Ingi er grunaður um aðild að svonefndu Skáksambandsmáli þar sem fíkniefni, falin í skákmunum, voru send í húsakynni Skáksambands Íslands í Skeifunni fyrr í vetur.

Sigurður Ingi var handtekinn við komuna hingað til lands seint í janúar síðastliðnum og hefur setið í gæsluvarðhaldi síðan þá. Fjórða apríl síðastliðinn var hann úrskurðaður í gæsluvarðhald til 18. apríl sem rann út í dag.

Lögreglan fór fram á að gæsluvarðhaldið yrði framlengt um fjórar vikur en dómurinn féllst ekki á þá kröfu en féllst á varakröfu lögreglustjóra, en það hljóðaði upp á gæsluvarðhald til 20. apríl næstkomandi, eða fram á föstudag.

Sigurður Ingi hefur setið í gæsluvarðhaldi á tólftu viku en ekki er heimilt að úrskurða sakborning í gæsluvarðhald til lengur en í tólf vikur nema mál hafi verið höfða gegn honum að brýnir rannsóknar hagsmunir krefjist þess.

Sigurður Ingi er eiginmaður Sunnu Elvíru Þorkelsdóttur sem slasaðist á heimili þeirra á Spáni í janúar síðastliðnum. Sunna Elvira var sett í farbann á Spáni þegar eiginmaður hennar Sigurður Kristinsson var handtekinn í janúar hér á landi grunaður um aðild að stórfelldum fíkniefnainnflutningi í svokölluðu skásambandsmáli. Farbanninu yfir Sunnu var aflétt á dögunum og hún kom til landsins með sjúkraflugi fyrir rúmri viku og var lögð inn á Grensás þar sem hún er í endurhæfingu eftir að hún lamaðist við fall á Málaga á Spáni.