Rodgers gæti lent í vandræðum með tengdapabba sinn

Leikstjórnandi Green Bay Packers, Aaron Rodgers, er í sambandi með kappaksturskonunni Danicu Patrick. Ekki er víst að tengdapabbi hans leggi blessun sína yfir sambandið strax.

Sá heitir TJ Patrick og er mikill föðurlandssinni. Hann hefur til að mynda engan skilning á því að leikmenn í NFL-deildinni séu að mótmæla í þjóðsöngnum fyrir leiki með því að fara niður á hné.

Danica var að enda feril sinn á Daytona 500 um daginn og Rodgers var mættur með henni. Er þjóðsöngurinn var leikinn stóð parið með hönd á brjósti.

„Það fer enginn niður á hné í NASCAR!! Hönd á hjarta!!!,“ skrifaði pabbinn á Facebook og lesa margir þessa færslu sem skot á tengdasoninn. Pabbinn hefur nefnilega líka skotið á Packers.

Þá stóð Rodgers fyrir því að leikmenn Packers læstu höndum saman í þjóðsöngnum og hann talaði fyrir því að leikmenn mættu tjá sig um þjóðfélagsmálefnin á þann hátt sem þeir vildu.

„Getur einhver útskýrt fyrir mér hverju þessir Packers-gaurar eru að mótmæla,“ skrifaði TJ er hann horfði á leikinn.