Hlakkar til að þurfa ekki að sinna síða hárinu

Ellefu ára stúlka ætlar að láta raka af sér allt hárið og gefa í hárkollur fyrir krabbameinssjúka. Samhliða safnar hún áheitum fyrir félag ungs fólks með krabbamein. Hún hefur engar áhyggjur af útkomunni og hlakkar til að þurfa ekki að sinna síða hárinu.

Ester Amíra Ægisdóttir er 11 ára gamall Hafnfirðingur sem þekkir krabbamein ágætlega. Þannig hafa báðar ömmur hennar greinst með, og sigrast á, krabbameini. Önnur þeirra missti hárið og notaðist við hárkollu um nokkra hríð. Ester segir þó að hugmyndin hafi í raun kviknað upp úr þurru.

„Það var svona þegar við fórum í sumarbústað um jólin fór mig að langa til að raka af mér hárið. Bara af því bara, ég veti ekki af vherju. Svo fór ég að hugsa, afhverju ekki að gera eitthvað úr því og styrkja gott málefni?“ segir Ester.

Ester ákvað að gefa hárið í hárkollugerð og safna í leiðinni áheitum fyrir Kraft, félag ungs fólks með krabbamein.

„Ég ætlaði að safna 100 þúsund og já, það gengur mjög vel. Ég er búin að ná því markmiði þannig að hárið fer af.“

Fínt að þurfa ekki að sinna hárinu

Hún hefur nú þegar safnað á þriðja hundrað þúsund krónum, en hárið verður rakað af á viðburðinum Perlað af Krafti í Hörpu á sunnudaginn. Þar ætlar fjöldi fólks að koma saman yfir skemmtiatriðum og perla armbönd sem seld eru til styrktar Krafti. Ester segir að auk þess sem henni finnist gott að styrkja gott málefni sé hún spennt fyrir þægindunum sem fylgja muni hárleysinu.

„Tíminn sem fer í að greiða þetta á morgnana og eftir sund, sturtu, íþróttir og æfingar o.s.frv. það fer alltaf svo mikill tími að ég held að þetta verði bara ógeðslega þægilegt sko.“

Fjölskylda Esterar og heimilishundurinn Valentín hafa öll tekið afar vel í framtakið, en aðspurður kveðst Valentín þó ekki geta hugsað sér að láta raka af sér hárið – þó málefnið sé gott. Ester segir skólafélagana einnig gríðarlega spennta fyrir uppátækinu. Hún segist hafa litlar áhyggjur af því að útkoman verði henni ekki að skapi.

„Nei, ég er bara spennt sko. Það vex aftur á ef þetta kemur ekki eins vel út og mig langaði. Ég er glöð með að gera góðverk og það vex aftur á þetta hár.“