Gunnar leiðir lista Sjálfstæðismanna á Akureyri

Gunnar Gíslason, bæjarfulltrúi Sjálfstæðisflokksins á Akureyri, var í dag kjörinn til að leiða lista flokksins í sveitarstjórnarkosningunum sem fram fara í maí. Gunnar leiddi einnig listann í kosningunum 2014.

Gunnar hlaut 86 atkvæði á fundi aðal- og varamanna í fulltrúaráði flokksins sem haldinn var í Brekkuskóla á Akureyri í dag. Axel Darri Þórhallsson hlaut sautján atkvæði í fyrsta sætið og aðrir samtals átta. Ógild og auð voru tvö.

Eva Hrund Einarsdóttir bæjarfulltrúi var ein í kjöri í 2. sæti listans og taldist því sjálfkjörin. Þórhallur Jónsson var kjörinn í 3. sæti listans, Lára Halldóra Eiríksdóttir 4. sæti, Berglind Ósk Guðmundsdóttir 5. sæti og Þórhallur Harðarson 6. sætið.

Bæjarfulltrúar Framsóknarflokks, L-listans og Samfylkingarinnar náðu samkomulagi um myndun meirihluta í bæjarstjórn Akureyrar eftir kosningarnar 2014.