Hafnarfjörður kærir Garðabæ

Hafnafjarðarbær hefur kært fyrirhugaða lokun Garðabæjar á gamla Álftanesveginum til úrskurðarnefndar um umhverfis- og auðlindamál.

„Þessi leið er mikið öryggisatriði. Verði veginum lokað þurfa sjúkra- og slökkviliðsbifreiðar að fara aðrar tafsamari leið í Norðurbæinn,“ segir Haraldur Líndal Haraldsson, bæjarstjóri í Hafnarfirði.

Íbúar bæði Hafnarfjarðarmegin og Garðabæjarmegin hafa mótmælt lokuninni á meðan íbúar í Prýðahverfi í Garðabæ hvetja til hennar til að minnka umferð við hverfið.

„Margir íbúar Hafnarfjarðar nota þessa leið til að komast til Reykjavíkur. Lokunin beinir þeim bílum í gegnum íbúðahverfi sem eykur þar umferð og kílómetrafjölda. Þá er fyrirséð að íbúar Garðabæjar muni nú þurfa að aka inn í Hafnarfjörð til að komast leiðar sinnar innan Garðabæjar,“ segir Haraldur. – jóe