Nýr innanríkisráðherra Ítalíu áformar að reka 500.000 úr landi

 

Matteo Salvini, nýskipaður innanríkisráðherra Ítalíu, segir að koma verði í veg fyrir að Sikiley breytist í flóttamannabúðir til frambúðar. Eitt hans fyrsta verk sem ráðherra var að sækja Sikileyinga heim og kanna aðstæður á eyjunni.

Salvini fer ekki í grafgötur með skoðanir sínar á innflytjendamálum og telst harðlínumaður í þeim efnum. Í samtali við blaðamenn á eyjunni viðurkenndi hann að áform sín væru harkaleg en sagði þau byggja á heilbrigðri skynsemi.

Salvini vill reka meirihluta hælisleitenda á Sikiley úr landi og koma í veg fyrir að fleiri geti bæst í hópinn. Töluverður fjöldi flóttamanna frá Norður-Afríku hefur farið sjóleiðina til Sikileyjar eða annara hluta Ítalíu á síðustu árum en nokkuð hefur dregið úr straumnum síðustu mánuði.

Salvini sagði á fjöldafundi í gær að gósentíð flóttamanna á Ítalíu væru lokið og sagði hælisleitendum að byrja að pakka fórum sínum í ferðatöskur.

Meðal áforma nýju ríkisstjórnarinnar á Ítalíu er að reka minnst hálfa milljón hælisleitenda úr landi án tafar.