Grínistinn með rangeygðu stjórnmálamennina hrellti líka Íslandsbanka

Þrátt fyrir að vera aðeins átján ára gamall hefur framhaldsskólanemanum Erlingi Sigvaldasyni tekist að hrella bæði stjórnmálamenn og heila bankastofnun með uppátækjum sínum á netinu.

Dagatal með völdu stjórnmálafólki í örlítið breyttri mynd rýkur út eins og heitar lummur og gervi-Twitter reikningur Íslandsbanka vakti vægast sagt athygli fyrir nokkrum mánuðum síðan.

Taka vel í framtakið

Erlingur greindi frá því í tísti á dögunum að hann hefði til sölu dagatöl með rangeygðum stjórnmálamönnum. Til stóð að bjóða upp á 30 eintök, en uppátækið vakti fljótt mikla athygli og ákvað hann því að margfalda framboðið.

Erlingur segir að þeir tólf stjórnmálamenn sem rötuðu í dagatalið séu einfaldlega sínir uppáhalds. Þeir hafi almennt tekið vel í framtakið og einn þeirra hefur þegar tryggt sér eintak.

„Það er Andrés Ingi, hann er kominn á listann. Ég tekk hann „next level“, hann er sá eini sem ég lagfæri bæði augun á,“ segir Erlingur.

„Stunda vændi eða Siggi frændi?“

Þetta er þó ekki í fyrsta sinn sem grínverkefni Erlings vekur athygli, en fyrir um ári síðan tók hann herferð Íslandsbanka og sneri rækilega út úr henni á nýjum Twitter aðgangi.

Sjá einnig:Falskur aðgangur Íslandsbanka á Twitter gerir grín að auglýsingaherferð bankans

Í herferðinni voru borgarar hvattir til að spara peninga, með auglýsingum á strætóskýlum á borð við „Ísbúð eða íbúð?“. Á Twitter reikningi Erlings var aftur á móti farið í umtalsvert grófara rím á borð við „Drekka safa eða kýla afa?“ og annað í þeim dúr.

„Svo var „Stunda vændi eða Siggi frændi?“. Þetta var svolítið gróft, en þetta sló í gegn,“ segir Erlingur.



Erlingur verður einn viðmælenda Íslands í dag, klukkan 18:55 í kvöld, strax eftir kvöldfréttir.