Velti bílnum eftir eftirför lögreglu

Ökumaður velti bíl sínum eftir eftirför lögreglu í höfuðborginni í nótt.

Í dagbók lögreglu segir að á fjórða tímanum hafi verið ekið á bíl í miðbænum og hafi tjónvaldurinn þá stungið af frá vettvangi. Skömmu síðar verða lögreglumenn varir við bílinn og sinnti ökumaðurinn hvorki ljós- né hljóðmerkjum lögreglu og endaði á því að velta bílnum. Reyndi hann þá að komast undan á hlaupum, en var handtekinn.

Í dagbók lögreglu segir einnig að skömmu eftir miðnætti hafi verið tilkynnt um mann sem reyndi að komast inn í bíl í bílastæðahúsi í miðbæ Reykjavíkur. Lögregla handtók manninn sem reyndist erlendur, mjög ölvaður ferðamaður. „Hann gat ekki sagt lögreglu hvar hann gisti og var nánast ósjálfbjarga sökum ölvunar. Hann því vistaður í fangageymslu þar til af honum rennur og hægt verður að tala við hann.“

Fluttir á slysadeild

Í miðbænum var einnig tilkynnt um meðvitundarlausan karlmann á skemmtistað í miðbænum um klukkan eitt og var hann fluttur með sjúkrabíl á slysadeild.

Sömuleiðis var tilkynnt um slasaðan mann á skemmtistað, meiddur á fæti, og var hann fluttur á slysadeild. Ekki sé vitað hver veittist að manninum.

Skömmu eftir klukkan eitt hafði maður dottið og rotast í miðbænum og var hann einnig fluttur á slysadeild. Sambærilegt atvik átti sér stað um klukkan 3:30, sömuleiðis í miðbænum.

Lögregla stöðvaði svo nokkra ökumenn vegna gruns um ölvun við akstur.