Óraunveruleg staða fyrir hið „góða Ísland“

„Þetta er ótrúleg staða. Hún er eitthvað svo óraunveruleg fyrir hið „góða Ísland“.“ Þetta segir Hrund Brynjólfsdóttir en hún er að missa íbúð sem hún hefur verið a' leigja í Grafarvoginum undanfarin fjögur ár. Íbúðin er nú seld og þarf hún að flytja út fyrir 1. maí. Ekkert gengur að finna aðra íbúð fyrir hana og dætur hennar þrjár, sem eru sex, þrettán og fimmtán ára gamlar.

Hrund segist sækja um nánast allar íbúðir sem hún sjái auglýstar, svo framarlega sem hún sjái fram á að geta greitt leiguna. Henni finnst mikilvægt að búa áfram í Grafarvoginum eða sem næst honum svo dætur hennar geti haldið áfram í sínum skóla og tómstundum.

Eins og áður segir hefur Hrund sótt um fjölmargar íbúðir að undanförnu og segist hún sjaldan fá svör við umsóknum. Hún hefur jafnvel sótt um stúdíóíbúð og tveggja herbergja íbúðir fyrir þær fjórar.

„Ef ég fæ svör, þá er það yfirleitt til að láta mig vita að búið er að leigja íbúðirnar út.“

Setið um íbúðir

Ástandið á leigumarkaðinum í Reykjavík er að flestra mati alvarlegt. Setið er um íbúðir sem eru til leigu og hefur verð þeirra hækkað til muna á undanförnum árum.

Greiningardeild Arion banka spáði því nýverið að til að anna eftirspurn þyrfti að byggja átta til tíu þúsund íbúðir á landinu öllu fram til ársloka 2019. Þá segir deildin ólíklegt að það muni takast.

Sjá einnig: Nánast ekkert til af íbúðum sem kosta minna en 30 milljónir

Sjá einnig: Húsnæðisverð hvergi hækkað meira en á Íslandi

Þar að auki segir Greiningardeildin að það þyrfti að byggja 35 til 40 þúsund íbúðir til ársins 2040.

Fjöldi íbúða til sölu og meðal sölutími hefur lækkað verulega og er í sögulegu lágmarki. Færri íbúðir eru á markaðinum, fleiri eru um hverja íbúð og þær seljast fljótt.

Reynir á taugarnar

Hrund er að skila BA ritgerð nú í vor ásamt því að vinna á sambýli. Hún segir ástandið reyna verulega á taugarnar og koma niður á svefni. Það sé erfitt að vita til þess að mögulega geti hún og dætur hennar endað á götunni eftir nokkrar vikur.

„Það dregur mann verulega niður að fá sömu svörin aftur og aftur. þetta tekur á, óvissan um að geta ekki verið örugg um að hafa þak yfir höfuðið, er slítandi,“ segir Hrund.