Hús erlendra tungumála fær nafn í dag

Í hádeginu í dag mun Jón Atli Benediktsson, rektor Háskóla Íslands, tilkynna um niðurstöðu í samkeppni um heiti nýs húss erlendra tungumála.

Efnt var til samkeppni um heiti hússins og bárust hátt í 800 tillögur frá rúmlega 1.000 einstaklingum. Valnefnd fór yfir tillögurnar og komst að einróma niðurstöðu sem háskólaráð staðfesti segir í tilkynningu. Í valnefnd áttu sæti þau Eiríkur Smári Sigurðarson frá Hugvísindasviði (formaður), Geir Þórarinn Þórarinsson, fulltrúi stjórnar SVF, Guðrún Kvaran, fulltrúi Vigdísarstofnunar, og Inga Jóna Þórðardóttir, fulltrúi rektors.

Tilkynnt verður um heitið í Hátíðasal í Aðalbyggingu og munu sigurvegarar í nafnasamkeppninni veita verðlaunum viðtöku. Húsið verður svo vígt við hátíðlega athöfn á sumardaginn fyrsta, fimmtudaginn 20. apríl næstkomandi.

Fréttin birtist fyrst í Fréttablaðinu