Ofbeldi og ótti hamlar konum

„Ofbeldi gegn konum og stúlkum í almenningsrýmum er hnattrænt vandamál,“ segir Inga Dóra Pétursdóttir, framkvæmdastýra UN Women á Íslandi, sem fer fyrir vitundarvakningu um eitt útbreiddasta mannréttindabrot í heiminum í dag; ofbeldi gegn konum og stúlkum.

Nú hafa samtökin sett af stað sölu á Fokk ofbeldi-húfu UN Women. Öll innkoma af sölu húfunnar rennur til verkefnis UN Women, Öruggar borgir (Safe Cities Global Initiative).

„Þetta átak er svolítið skemmtilegt að því leytinu til að það er verið að leggja áherslu á það að vandamálin eru ekki bara í ákveðnum borgum í ákveðnum löndum. Heldur úti um allan heim en birtingarmyndir ofbeldisins eru ólíkar,“ segir Inga Dóra sem hefur ferðast til nokkurra borga sem hafa skuldbundið sig til að taka þátt í því að tryggja öryggi kvenna í borgum.

„Ég kom til Mexíkóborgar þar sem atvinnuþátttaka kvenna er um 50 prósent. Þar ferðast 70 prósent fólks með almenningssamgöngum og þar er mjög mikil kynferðisleg áreitni og ofbeldi. Þar í borg var ákveðið að gera almenningssamgöngur öruggari.

Hér í Reykjavík upplifa 70 prósent kvenna sig óörugg í miðborginni. Þetta eru allt ólíkar birtingarmyndir, en hafa sömu áhrif og draga úr athafnafrelsi kvenna. Ofbeldi gegn konum og ótti við ofbeldi getur hindrað konur í að sækja um vinnu, haft áhrif á það hvernig þær eyða frítíma sínum og margt fleira. Þær hafa minna val og þessu viljum við breyta,“ segir Inga Dóra og segir mikilvægt að Reykjavíkurborg hafi skuldbundið sig til verkefnisins árið 2014.

„Það mikilvægasta er þó að það verði almenn hugarfarsbreyting,“ bendir Inga Dóra á. „Ofbeldi er víða hluti af lífi kvenna og það þarf vakningu um kynbundið ofbeldi. það þarf að viðurkenna vandann og koma fólki í skilning um alvarlegar afleiðingar þess,“ segir Inga Dóra en rannsóknir á vegum Sameinuðu þjóðanna sýna að konur sem búa á þéttbýlissvæðum eru tvöfalt líklegri til að verða fyrir ofbeldi, sérstaklega í fátækustu löndum heims.