Handbolti

Veszprem höfðar mál gegn Aroni Pálmarssyni | Skrópaði á fyrstu æfingu

Óskar Ófeigur Jónsson skrifar
Aron Pálmarsson.
Aron Pálmarsson. Vísir/Getty
Það er allt farið í bál og brand í samskiptum milli ungverska félagsins Veszprem og íslenska landsliðsmannsins Arons Pálmarssonar.

Aron mætti ekki á æfingu hjá Veszprem í dag eins og hann átti að gera en þá hófust æfingar fyrir komandi leiktíð.

Aron sendi þjálfaranum Ljubomir Vranjes smáskilaboð fimmtán mínútum fyrir æfingu þar sem hann tjáði Svíanum að hann myndi ekki mæta á æfinguna.

Aron Pálmarsson mun fara til Barcelona eftir komandi tímabil en hefur ekkert farið leynt með það að hann vill komast þangað strax.Samningur Arons og Veszprem nær hinsvegar til 30. júní 2018 og Barcelona ætlar ekki að kaupa Aron frá ungverska liðinu.

Félögin funduðu um framtíð Arons í lok síðasta mánaðar en niðurstaðan af þeim viðræðum var að Aron myndi klára komandi tímabil með ungverska liðinu.

Þegar Aron lét síðan ekki sjá sig í dag og þjálfarinn fékk að vita af því með SMS: Ungverska liðið brást mjög illa við þessari ákvörðun Arons og skrifaði strax um skróp hans á heimasíðu sína.

Ljubomir Vranjes sagði í fréttinni á heimasíðu Veszprem að Aron fengi ekkert tækfæri hjá Veszprem á næsta tímabili því svona framkoma væri ekki liðin hjá félaginu. „Atvinnumaður á ekki að setja sína eigin hagsmuni fram fyrir hagsmuni liðsins,“ er haft eftir Vranjes á heimasíðu Veszprem.

Ungverjarnir ætla nú að fara í hart og höfða mál gegn Aroni Pálmarssyni vegna brots á samningi hans og félagsins sem er enn í fullu gildi þótt að Aron vilji komast til Barcelona.  Það er erfitt að sjá íslenska landsliðsmanninn spila aftur fyrir Veszprem eftir atburði dagsins en hvar eða hvort hann spilar einhversstaðar 2017-18 á eftir að koma í ljós.






Fleiri fréttir

Sjá meira


×