Ekki formleg leit að Arturi í dag

Ekki verður farið í formlega leit að Arturi Jarmoszko, 26 ára karlmanni sem ekkert hefur spurst til frá því um mánaðamótin. Þess í stað verður ákveðið að afla frekari tölvugagna og vísbendinga í málinu, að sögn lögreglu.

Þetta var ákveðið á stöðufundi lögregluyfirvalda og björgunarsveita í hádeginu í dag, en fyrirhugað var að björgunarsveitir og Landhelgisgæslan myndu leita að Arturi í dag, á svipuðum slóðum og í gær – eða frá Nauthólsvík að Kópavogshöfn.

Guðmundur Páll Jónsson, sem stýrir rannsókn málsins, segir að haldið verði áfram að leita, en þó ekki með formlegum hætti. „Við erum að leita úr þeim gögnum og ábendingum sem okkur er að berast," segir hann í samtali við Vísi.