Björn Steinbekk sýknaður í miðasölumálinu

Héraðsdómur Reykjavíkur sýknaði í dag Björn Steinbekk í miðasölumálinu svokallaða. Þá var málskostnaður felldur niður.

Gísli Hauksson, fyrrverandi forstjóri GAMMA, keypti tíu miða af Birni á leik Íslands og Frakklands á Evrópumótinu í knattspyrnu síðasta sumar. Alls kostuðu miðarnir 686 þúsund krónur, en Gísli var á meðal þeirra sem aldrei fékk miðana í hendurnar. Gísli krafðist endurgreiðslu miðanna en Björn var sem fyrr segir sýknaður af þeirri kröfu.

Björn fullyrti fyrir dómi þann 1. mars síðastliðinn að bróðurpartur allra seldra miða, tæplega 500 talsins, hafi þegar verið endurgreiddur, eða allt að 85 prósent þeirra. Hann sagðist hafa millifært níu milljónir króna af reikningi Sónar Reykjavíkur inn á eigin reikning einum degi eftir að miðasalan fór úrskeiðis, til þess að tryggja það að allir fengju endurgreitt. Eftir það hafi lögmannsstofan Forum tekið við og séð um að endurgreiða milljónirnar níu.

Sjá einnig: Miðasalan átti að koma Sónar Reykjavík upp úr skuldasúpunni

Aðspurður sagði Björn að stjórn félagsins Sónar Reykjavík hafi ákveðið í sameiningu að festa kaup á miðum á leiki á Evrópumótinu. Félagið hafi staðið illa fjárhagslega og að stjórnarmeðlimir hafi talið félagið geta hagnast á miðasölunni. Þannig gæti félagið jafnframt greitt niður útistandandi skuld við tónlistarhúsið Hörpu. Hafi því verið tekin ákvörðun um að kaupa alls 456 miða, en ekki tókst að afhenda nema 389 þeirra. 

Erna Björk Häsler, stærsti eigandi Sónar Reykjavíkur ehf, og eiginkona Björns, staðfesti fyrir dómi að stjórn félagsins hafi ákveðið í sameiningu að standa að sölu miða á landsleikinn. Björn hafi ekki staðið sjálfur að miðasölunni heldur verið í forsvari fyrir félagið.

Eldar Ástþórsson, sem var stjórnarmaður í félaginu á þeim tíma sem málið kom upp, sagðist hvorki hafa vitað til þess að slíkar hugmyndir hafi verið uppi né að þessi ákvörðun hafi verið tekin af stjórninni. Eldar sagði sig úr stjórn félagsins eftir að málið kom upp. „Mér mislíkaði þessir viðskiptahættir,“ sagði hann fyrir dómi.

Seljandi miðanna Sónar Reykjavík

Héraðsdómur féllst á að seljandi miðanna hafi verið Sónar Reykjavík ehf. Þrátt fyrir að Björn hafi auglýst miðana persónulega til sölu á sinni Facebook síðu þá hafi mátt vera ljóst að kaupandi væri að kaupa miðana af Sónar Reykjavík þar sem peningurinn var lagður inn á reikning félagsins. Sónar Reykjavík var því seljandi miðanna. 

Hins vegar var fallist á það að Björn hafi komið þannig fram í viðtölum eftir EM að ekki væri ljóst hver væri seljandi miðanna. 

„Dómurinn er hárréttur,” segir Þorsteinn Einarsson, verjandi Björns, í samtali við Vísi

„Hann er sýknaður af kröfunni og það er nákvæmlega það sem lagt var upp með og í samræmi við það sem krafist var og í samræmi við væntingar. Dómurinn er bara réttur, það er bara ekkert öðruvísi.“