Enginn þriggja ráðherra tók af skarið við Mývatn

„Mikill tími og orka hefur farið í ýmsa fundi með ráðamönnum þjóðarinnar til að fá ríkið að borðinu í fráveitumálum en án sýnilegs árangurs,“ skrifar Þorsteinn Gunnarsson, sveitarstjóri Skútustaðahrepps, í nýjasta fréttabréfi sveitarfélagsins.

„Hver einasti aðili sem ég og aðrir fulltrúar sveitarstjórnar höfum rætt við undanfarnar vikur hefur sýnt frárennslismálunum skilning en það sorglega í þessu er að enginn af þeim þremur ráðherrum sem hafa völdin í hendi sér, það er umhverfis- og auðlindaráðherra, fjármálaráðherra og ráðherra sveitarstjórnarmála, hefur tekið af skarið,“ heldur Þorsteinn áfram.

Eins og komið hefur fram í fréttum síðasta árið eru frárennslismál sveitarfélagsins ekki í samræmi við lög og reglur, og er talið að mengun frá byggð eigi sinn þátt í ýmsum vandamálum sem steðja að lífríki Mývatns.

Sveitarfélagið ræður hins vegar ekki við að bæta frárennslismál sín sjálft, enda munu þær umbætur kosta um 400 milljónir króna, að talið er. Ráðamenn í Skútustaðahreppi hafa því lengi leitað eftir aðstoð ríkisins og þrýstingur á aðgerðir aukist eftir umfjöllun um málið að undanförnu.

„Flestir þingmenn kjördæmisins hafa tekið mjög vel í málaleitan okkar og lagt sitt lóð á vogarskálarnar en það er ráðherranna að klára málið,“ skrifar Þorsteinn sem kveður nú enn hert að sveitarfélaginu og rekstraraðilum með bréfum sem bárust heilbrigðiseftirlitinu.

„Sveitarstjórn hefur brugðist við með því að fara fram á það við heilbrigðiseftirlitið að það sinni leiðbeiningarskyldu sinni sem opinbert stjórnvald og fundi með sveitarfélaginu og rekstraraðilum. Ýmsir aðilar hafa sett sig í samband við mig og sveitarstjórnarfulltrúa til þess að lýsa yfir áhyggjum sínum af þróun mála. Við höfðum áður lýst því yfir að sveitarfélagið muni ekki skorast undan ábyrgð sinni þegar kemur að fráveitumálum í þéttbýli og undirbúningur fyrir þá vinnu er þegar hafinn,“ segir sveitarstjórinn.

Fréttin birtist fyrst í Fréttablaðinu.