Fjármálaráðuneytið telur að Þingvallagrunnurinn sé of dýr

Fyrirhuguð kaup ríkisins á umtöluðum húsgrunni í þjóðgarðinum á Þingvöllum virðast úr sögunni miðað við afstöðu fjármálaráðuneytisins sem nefnir verðið sem ásteytingarstein í málinu.

„Ráðuneytið hefur farið yfir forsögu málsins og telur ekki að fullnægjandi forsendur séu til staðar til að hefja viðræður um kaup á umræddum lóðarréttindum og húsgrunni miðað við það verð sem lagt hefur verið til grundvallar í máli þessu,“ segir fjármálaráðuneytið í svari til umhverfisráðuneytisins 9. maí síðastliðinn.

Umhverfisráðuneytið, sem tók við málefnum Þingvallaþjóðgarðs af forsætisráðuneytinu við síðustu ríkisstjórnarskipti, sendi í lok mars fjármálaráðuneytinu bréf þar sem óskað var eftir að hafnar yrðu viðræður um kaup á húsgrunninum Valhallarstíg 7. Grunnurinn var steyptur upp skömmu fyrir hrun. Í fyrra var hann auglýstur til sölu og barst 70 milljóna króna tilboð sem Þingvallanefnd ákvað eftir nokkrar sviptingar að gengið yrði inn í með því að neyta forkaupsréttar. Lóðin, sem er leigulóð í eigu ríkisins, var sögð geta opnað fólki aðgang að vatninu og að til dæmis mætti nýta grunninn sem nestispall.

Óljóst er hvort þessi afstaða fjármálaráðuneytisins þýðir að kaup ríkisins séu algerlega úr sögunni og hvað verður um húsgrunninn þar sem svör þar um fengust hvorki frá ráðuneytinu né þjóðgarðsverði í gær. Sömuleiðis fengust ekki nánari skýringar á því hvernig fjármálaráðuneytið komst að niðurstöðu.

Bergþóra Njála Guðmundsdóttir, upplýsingafulltrúi umhverfisráðuneytis, segir ráðuneytið ekki hafa aðhafst frekar í málinu. Þingvallanefnd hafi fengið afrit af bréfi fjármálaráðuneytisins og ekki hafi borist bréf frá nefndinni til um­hverfis­ráðuneytisins vegna málsins. Þegar Ólafur Örn Haraldsson þjóðgarðsvörður var spurður að því fyrir hálfum mánuði hvernig hefði farið með forkaupsréttinn sem Þingvallanefnd vildi nýta á Valhallarstíg 7 svaraði hann því hins vegar til að hann vissi ekki um stöðu málsins.

„Ég veit ekki hvar málefni varðandi Valhallarstíg nr. 7 stendur. Þingvallanefnd hefur lagt fram sín sjónarmið sem þú þekkir og málið fór til ráðuneyta,“ sagði þjóðgarðsvörður í skriflegu svari. Daginn eftir voru honum sendar nýjar spurningar frá Fréttablaðinu. „Er ekki verið að skoða ofan í kjölinn hvort lögum og reglum hafi verið fylgt við framkvæmdir á Valhallarstíg 7 eins og fram hefur komið að áhöld séu um?“ var Ólafur Örn meðal annars spurður. Með spurningunni er vísað til þess að í október 2016 lýsti þjóðgarðsvörður því í bréfi til forsætisráðuneytisins, sem Þingvallaþjóðgarður heyrði þá undir, að Þingvallanefnd teldi „að þar sem sumarhúsin voru rifin og steyptur var í stað þeirra grunnur á stöplum ásamt kjallara séu hugsanlega í reynd brostnar forsendur fyrir því að endurbygging sumarhúsanna teljist til þeirra lagfæringa eða breytinga sem þegar var búið að samþykkja.“

Enn hafa ekki borist svör frá þjóðgarðsverði varðandi þessa síðari spurningu. „Verði mannvirki byggt á grunninum er ljóst að það verður stærsta mannvirki innan þjóðgarðsins í eigu einstaklinga,“ sagði hann hins vegar í fyrrgreindu bréfi til forsætisráðuneytisins.