Það verða alveg gleðileg jól

„Jú, ég er í París eins og venjulega,“ segir Jóhann Nardeau trompetleikari glaðlega, þegar slegið er á þráðinn til hans. Hann er þrítugur í dag og því afmælisbarn dagsins. „Það er rétt, ég er að verða þrjú þúsund ára gamall. Takk fyrir að minna mig á það,“ segir hann og hlær hjartanlega. Ætlar hann ekki að halda upp á daginn? „Jú, reyndar er ég að kenna - skólarnir fara ekki í frí hér fyrr en á hádegi á Þorláksmessu - en eftir það er konan mín, hún Aurélia, með eitthvað á prjónunum. 

Á gamlárskvöld ætlum við svo að halda partý og fagna nýjum árum, bæði aldursárum og 2018. Ég ætla að reyna að fá einhvern jólasvein til að koma með smá hangikjöt í það partý. Annars er ágætan mat að finna hér í Parísarborg, þannig að þó jólasveinninn komist ekki verður engin katastrófa.“

Jóhann segir þau hjón ætla að vera hjá tengdaforeldrum hans á aðfangadagskvöld og eiga svo von á föðurafa hans og frænku í heimsókn einhvern daginn í mat. „Það verða alveg gleðileg jól,“ segir hann.

 „Þó er ekki sama helgi sem einkennir aðfangadagskvöld hér og heima - fyrr en á miðnætti í kirkjunum, Frakkar vaka yfir Jesúbarninu. En búðirnar eru opnar hér alveg til sjö, átta.

Í okkar fjölskyldu er samt borðuð mikil máltíð sem er teygð í alla enda. Fólk mótar hátíðina eftir ólíkum hefðum, það er ekki eins og heima, þar sem allt verður heilagt klukkan sex, beðið við útvarpið eftir klukknahringingunni og engir á ferli úti við.“

Gætir þú hlustað á íslensku messuna í útvarpinu?

„Já, trúlega gæti ég það. Veit samt ekki alveg hvort það væri stemning fyrir því hjá foreldrum Auréliu. Ég gæti kannski sett messuna í annað eyrað!“

Jóhann segir jólastress í París, hann finni það í umferðinni. „Þetta er svolítið erfiður tími. En svo endar þetta alltaf með því að jólin koma!“

Hann kveðst ekkert þurfa að spila um hátíðina. „Ég er kominn í tónleikafrí síðan á mánudag, áður var ég með fimm tónleika á fjórum dögum. Allt gekk vel en víst var gott þegar það var búið.“

Þar sem franskir kennarar fara seint í jólafrí eru þeir í fríi til 8. janúar, að sögn Jóhanns, þannig að hann ætlar að koma til Íslands 2. janúar, ásamt Auréliu sinni. „Við verðum heima á þrettándanum,“ segir hann hress og biður fyrir jólakveðjur.

gun@frettabladid.is