Innlent

Atla Rafni vikið frá Borgarleikhúsinu

Jakob Bjarnar og Kolbeinn Tumi Daðason skrifa
Uppnám ríkir innan Borgarleikhússins eftir að Kristín Eysteinsdóttir vék Atla Rafni fyrirvaralaust frá störfum.
Uppnám ríkir innan Borgarleikhússins eftir að Kristín Eysteinsdóttir vék Atla Rafni fyrirvaralaust frá störfum.
Neyðarástand ríkir nú í Borgarleikhúsinu og er búið að taka leiksýninguna Medeu, sem til stóð að frumsýna 29. desember næstkomandi, úr sölu. Ástæðan er sú að Kristín Eysteinsdóttir leikhússtjóri vék Atla Rafni Sigurðarsyni leikara, sem fer með burðarhlutverk í verkinu, fyrirvaralaust frá húsinu. Samkvæmt heimildum Vísis mun ástæða brottvikningarinnar vera ásakanir sem settar hafa verið fram í tengslum við Metoo-byltinguna.

Vísi hefur ekki tekist að ná tali af málsaðilum, þeim Kristínu né Atla Rafni, þrátt fyrir ítrekaðar tilraunir. Vísir gerði tilraun til að kaupa miða á Medeu en svör í miðasölu voru eftirfarandi:

„Það er búið að loka fyrir sölu eins og er.“

Verður ekki hægt að komast á sýninguna um jólin?

„Ég býst ekki við því eins og er. Það gæti verið að þessu verði frestað. Það verður fundað í dag,“ sagði konan í miðasölu Borgarleikhússins.

Mikil óvissa og málið viðkvæmt

Ekki hefur heldur tekist að ná í Birnu Hafstein, formann Leikarafélagsins, vegna málsins. Sömuleiðis hefur Vignir Egill Vigfússon​, markaðsfulltrúi leikhússins, ekki svarað símtölum. Þá hefur markaðsstjóri Borgarleikhússins, María Hrund Marinósdóttir, ekki svarað símtölum Vísis. Ljóst er að málið er afar viðkvæmt.

Eftir því sem næst verður komist var Atla Rafni ekki gefinn kostur á að grípa til varna. Hann mun nú vera að skoða sinn rétt þar sem hann telur málsmeðferðina óboðlega og tildrögin óljós. Stjórnendur leikhússins vísa hins vegar til þess að það sé sjálfseignastofnun og þurfi því ekki að fara eftir þeim verkferlum sem opinberar stofnanir þurfa að hlíta.

Óvissa ríkir innan leikhússin. Starfsfólki er kunnugt um uppsögnina en þeim mun hins vegar ekki hafa verið gerð grein fyrir því í hverju ásakanirnar á hendur Atla Rafni felast.

Verkefnastaðan í fullkomnu uppnámi

Atli Rafn hefur verið einn farsælasti leikari þjóðarinnar undanfarin árin. Hann er fastráðinn við Þjóðleikhúsið en er í ársleyfi til að sinna verkefnum í Borgarleikhúsinu.

Sem áður sagði stóð til að hann gegndi veigamiklu hlutverki í Medeu eftir Evrípídes í leikstjórn Hörpu Arnardóttur, sem átti að vera jólasýning Borgarleikhússins. Þá átti Atli Rafn að fara með hlutverk krypplingsins í Rocky Horror sem samkvæmt sýningaskrá stendur til að frumsýna í mars. Leikstjóri söngleiksins þess er Marta Nordal.

Þá hefur Atli Rafn jafnframt verið að leika í sýningunni Kartöfluæturnar eftir Tyrfing Tyrfingsson í leikstjórn Ólafs Egilssonar sem hefur verið til sýninga á fjölum Borgarleikhússins. Það má þannig ljóst vera að fullkomið uppnám ríkir vegna málsins innan veggja Borgarleikhússins.

Medea fyrsti femínistinn

Kristín Þóra Haraldsdóttir hefur verið að æfa hlutverk Medeu og hún segir í nýlegu viðtali sem birtist í Fréttablaðinu eftirfarandi um persónuna sem hún hefur verið að undirbúa sig við að túlka:

„Sumir segja að Medea sé fyrsti femínistinn. „Og ég hef spurt mig, hvað þarf til að eitthvað breytist varðandi ofbeldi í garð kvenna? #metoo byltingin snýst ekki um hefnd heldur réttlæti og kannski er Medea í grunninn að leita að einhvers konar réttlæti.“


Tengdar fréttir

Medea og myrkrið

Kristín Þóra Haraldsdóttir leikkona tekst nú á við eitt þekktasta og harmrænasta hlutverk leikbókmenntanna meðfram því að halda jól með fjölskyldunni.




Fleiri fréttir

Sjá meira


×