Íslendingar í Simbabve beðnir um að láta vita af sér

Utanríkisráðuneytið biður Íslendinga sem kunna að vera í Zimbabwe að láta ættingja og vini vita af sér. Þetta kemur fram á Facebook-síðu ráðuneytisins.

Þar segir að fólk skuli hafa samband við borgaraþjónustu ráðuneytisins ef aðstoðar er þörf í síma 545-9900. Sænska sendiráðið í Harare mun aðstoða alla norræna ríkisborgara sem þurfa á aðstoð að halda.

Herinn í Simbabve tók í nótt yfir ríkisfjölmiðil landsins og hafa heyrst skothljóð og sprengingar í höfuðborginni Harare. Hershöfðingi birtist á skjám Simbabvemanna þar sem hann fullyrti að valdarán standi ekki yfir og að forsetinn og fjölskylda hans væri örugg.

Robert Mugabe, forseti Simbabve frá árinu 1980, er nú í haldi og heill á húfi samkvæmt Twitter-síðu valdaflokksins Zanu PF.