Guðni Th. Jóhannesson, forseti Íslands, bauð þeim stöllum til Bessastaða í dag til að ræða málin og biðja þær afsökunar á sínum hlut í málinu, en hann veitti Robert Downey uppreist æru á síðasta ári samkvæmt tillögu frá Ólöfu Nordal, þáverandi innanríkisráðherra.
Forsetinn kom fyrst á talsambandi við Glódísi, Önnu og Höllu í gegnum Þórhildi Sunnu Ævarsdóttur, þingmann Pírata, sem hefur fjallað mikið um mál er varða uppreist æru.
„Hún hafði samband við okkur og kom erindinu okkar til skila um að hann vildi fá að hitta okkur. Svo hringir hann í mig og við ákváðum tíma, í dag klukkan tvö á Bessastöðum,“ segir Anna Katrín.
„Ástæðan var að hann vildi biðja okkur afsökunar á sínum hlut í þessu máli.“
„Við vorum bara ánægðar með það að hann stóð upp og tók ábyrgð og baðst afsökunar og tókum því bara gildu,“ bætir Glódís Tara við.
Forsetinn sagðist vera stoltur
Þær segja að samtalið við forsetann hafi verið einlægt og alls ekki formlegt. Forsetinn hafi þakkað þeim fyrir baráttu sína og sagst vera stoltur af þeim.
„Hann var mjög ánægður með okkur að hafa hátt án þess að reiðast og öskra og vera með læti. Að við höfum gert þetta með ró,“ segir Glódís Tara.
„Hann baðst afsökunar á sínum hluta í þessu máli og tók fulla ábyrgð á því, fyrir hvað þetta hafi valdið okkur mikilli vanlíðan, að hann hafi fengið uppreist æru. Þetta hafði setið þungt á honum og hann sagði að það væri ekki eitthvað sem hann gæti hunsað. Við metum það virkilega miklis og finnst það sýna hvað hann er góður og einlægur maður,“ segir Anna Katrín.
„Í miðjum stjórnarmyndunarviðræðum þá gaf hann sér tíma til að hlusta á okkur og óskaði eftir því sjálfur og leitaðist eftir því sjálfur. Það er kannski það sem okkur þykir vænst um. það eru margir sem mættu taka sér það til fyrirmyndar.“
Þær segja að örfáir stjórnmálamenn hafi komið til máls við þær í kjölfar þess að Robert Downey hlaut uppreist æri. Einhverjir hafi haft samband við Berg Þór Ingólfsson leikstjóra sem hefur mikið rætt málið en Robert braut einnig á dóttur hans, Nínu.
„Við höfum kallað eftir viðbrögðum frá þeim og höfum kallað eftir að fá svör og að þau taki eftir okkur og hlusti á okkur. En þau hafa ekki gert það. Enginn nema Þórhildur Sunna og Svandís hjá Vinstri grænum. Það hefur enginn annar hlustað á okkur,“ segir Anna Katrín.
Þær segja að flestir stjórnmálamenn skýli sér á bakvið kerfið. Þær fagna því að einhverjar breytingar hafi orðið síðan málið kom upp í byrjun sumar en segjast vona að meiri árangur náist í þessum málum.
Þetta er ekki í fyrsta sinn sem Guðni boðar fólk á sinn fund vegna mála er varða uppreist æru. Í september síðastliðnum átti hann fund með fyrrverandi stjúpdóttur Hjalta Sigurjóns Haukssonar. Hjalta var sem kunnugt er veitt uppreist æra í september í fyrra, sama dag og Robert Downey. Hjalti var árið 2004 dæmdur í fimm og hálfs árs fangelsi í Hæstarétti fyrir áralöng kynferðisbrot gegn stjúpdóttur sinni. Ræddu þau mál Hjalta og hvernig ferlið fór fram.
