Þorgerður lætur af störfum sem kórstjóri hjá MH

Þorgerður Ingólfsdóttir, kórstjóri Hamrahlíðakóranna mun láta af störfum nú í haust eftir 50 ár í starfi sem kórstjóri við Menntaskólann í Hamrahlíð. Hefur staða kórstjóra verið auglýst á vef stjórnarráðsins.

Þorgerður hefur verið stjórnandi kórs MH frá stofnun hans árið 1967 og árið 1982 stofnaði hún framhaldskór hans, Hamrahlíðarkórinn. Hún er enn um þessar mundir að stjórna kór skólans en gert er ráð fyrir að hún láti af störfum í lok október.

Undir forystu Þorgerðar hafa kórarnir tveir unnið hvern sigurinn af öðrum hvort sem er á tónleikum innanlands eða á alþjóðlegum tónlistarhátíðum víða um heim. Þúsundir ungmenna hafa hlotið tónlistaruppeldi í Hamrahlíðarkórunum hjá Þorgerði, meðal þeirra eru margir af fremstu tónlistarmönnum þjóðarinnar.

Þegar Þorgerður kom til starfa sem kórstjóri hjá Menntaskólanum við Hamrahlíð var hún aðeins litlu eldri en nemendurnir sjálfir, eða um 23 ára gömul. Engu að síður vann hún þar frumkvöðlastarf í kórastarfi á Íslandi því í þá daga var engin hefð fyrir því að í framhaldsskólum landsins væru kórar nemenda starfandi. Hún sest nú í helgan stein á sínu 74. aldursári.

Ekki náðist í Þorgerði við vinnslu fréttarinnar.